Իսպանիայի հարկային մարմինները հետաքննում են Խուան Կառլոս I-ի որսի ծախսերը, որին նրան հրավիրել են 2014 թվականին գահից հրաժարվելուց հետո, գրում է El Mundo թերթը:

Իսպանիայի հարկային ծառայությունը խնդրում է, որպեսզի պատվավոր թագավորը հիմնավորի, թե ով է վճարել որսի հետ կապված ծախսերը։ Վերջին տարվա ընթացքում Ֆինանսական եւ հարկային տեսչության վարչությունը մի շարք հարցումներ է ուղարկել երկրի նախկին ղեկավարին՝ տեղեկություններ ստանալու համար։

Մասնավորապես, Խուան Կառլոս I-ին խնդրում են պարզաբանել այն միջոցների ծագումը, որոնց հաշվին վճարվել են թռիչքները եւ այլ ծախսերը որսի ժամանակ, որին նա հրավիրվել է 2014-2018 թվականներին։ Այս հետաքննության շրջանակներում իշխանությունները նաեւ ցանկանում են իմանալ որոշ նվերների մասին, որոնք ստացել է պետության նախկին ղեկավարը։

2020 թվականի օգոստոսին պաշտոնապես հայտնի դարձավ, որ Խուան Կառլոս I-ը հայտնել է իր որդուն՝ թագավոր Ֆիլիպ VI-ին, իր հետ կապված սկանդալների ֆոնին երկիրը լքելու որոշման մասին։ Այդ ժամանակվանից նա բնակվում է ԱՄԷ-ում։ Իսպանիայում 84-ամյա պատվավոր միապետը մի քանի հետաքննության է ենթարկվել՝ առանց նրա դեմ մեղադրանք առաջադրելու։ Մարտի սկզբին Իսպանիայի դատախազությունը հայտարարել է քննչական գործողությունները փակելու մասին։

Արդյունքում, այս տարվա մայիսին Խուան Կառլոս I-ը երկու տարվա ընթացքում առաջին անգամ այցելել է թագավորություն։ Կարճ այցից հետո պատվավոր միապետը կրկին վերադարձել է ԱՄԷ։