նախընտրելի դարձնել
Թվային տրանսֆորմացիան լուրջ առավելություններ ունի, եւ այս ոլորտում Հայաստանի համար կարող է հեռանկարային շուկա բացվել։ Այս մասին հունիսի 14-ին SILICON MOUNTAINS-2022 միջազգային տեխնոլոգիական գագաթնաժողովի նախօրեին լրագրողների հետ հանդիպմանն ասաց Տեղեկատվական եւ հաղորդակցական տեխնոլոգիաների ոլորտի գործատուների միության նախագահ Արմեն Բալդրյանը։
Նա նաեւ մատնանշեց առկա մարտահրավերները, նկատելով, որ կիբերանվտանգության ոլորտում թվային տրանսֆորմացիան ու զարգացումը կպահանջեն ենթակառուցվածքների զարգացում եւ լուրջ ներդրումներ։ «Դրա հետ է կապված ՀՀ կենտրոնական բանկի հետաքրքրությունը ոլորտում եւ գագաթնաժողովի կազմակերպման մեջ»,- պարզաբանեց Բալդրյանը։ Նա նշեց լայնաշերտ ինտերնետ հասանելիության ընդլայնման եւ այդ ուղղությամբ մասնավոր հատվածի եւ պետության համագործակցության կարեւորությունը։
ՀՀ Կենտրոնական բանկի ֆինանսական համակարգի կայունության եւ կարգավորման վարչության պետ Գարեգին Գեւորգյանը հավելեց, որ ԿԲ-ն գնում է թվային վերափոխման ճանապարհով եւ իր աշխատանքը կազմակերպելու համար առաջնորդվում է կիբերանվտանգության ժամանակակից եւ հուսալի լուծումներով։
Նա հիշեցրեց, որ ՀՀ Կենտրոնական բանկը թվային օրակարգ է նախաձեռնում՝ ֆինանսական ոլորտում կիբերանվտանգության խնդիրների համար լուծումներ գտնելու համար։ «Մեր կարծիքով՝ ֆինանսական ապագան սերտորեն կապված է թվային տեխնոլոգիաների զարգացման հետ»,- ընդգծեց Գեւորգյանը։
Հայաստանում Ամերիկայի առեւտրի պալատի նախագահ Աշոտ Հովհաննիսյանի խոսքով՝ թվային տրանսֆորմացիան ենթադրում է ոչ միայն ավանդական մոդելների տեղափոխում թվային հարթակ, այլեւ նոր տեխնոլոգիաների ստեղծում։ «Կենտրոնում պետք է լինի մարդը, մինչդեռ հաճախ հակառակն է լինում՝ մարդուն ստիպում են հարմարվել ինստիտուտների փոփոխություններին»,- եզրափակեց նա։
Հիշեցնենք, որ հունիսի 17-ին Երեւանում տեղի կունենա SILICON MOUNTAINS-2022 միջազգային տեխնոլոգիական գագաթնաժողովը, որը նվիրված է թվային տրանսֆորմացիային։
Նշենք, որ գագաթնաժողովի տեղեկատվական գործընկերը NEWS.am լրատվական-վերլուծական գործակալությունն է:
