նախընտրելի դարձնելՍյունիքի մարզի Աղավնո եւ Նռնաձոր գյուղերում բոլոր բնակիչները տրամադրված են մարտական: Այս մասին այսօր՝ հուլիսի 8-ին, Ֆրանսիայի հրապարակում «Դիմադրություն» շարժման հանրահավաքի ժամանակ հայտարարեց «Հայաստան» խմբակցության պատգամավոր Ասպրամ Կրպեյանը:
«Աղավնոյի համայնքապետի հետ զրուցեցինք, ասաց, որ մի թիզ անգամ նահանջելու տեղ չկա, ընդհակառակը՝ վերականգնելու են ու պաշտպանելու են ժառանգություն ստացած սրբազան հայրենիքը: Ասաց՝ իմ զավակներին պետք է փոխանցեմ հավերժական հայրենիք ունենալու երազը, ու ես իրեն հավատում եմ իրեն»,- նշեց Կրպեյանը:
Պատգամավորը կիսվեց նաեւ Նռնաձոր կատարած այցի տպավորություններով: «Նռնաձորը փոքրիկ գյուղակ է, որտեղ ապրում են Գետաշենի ենթաշրջանից բռնագաղթված մեր հայրենակիցները: Իրենք 1990-ականներին Գետաշենում են կռվել, իրենց սերունդները հիմա՝ Նռնաձորում են: 44-օրյա պատերազմի ժամանակ 14-ամյա Վարդանը մեկ ձիով ապահովել է մի ամբողջ գնդի ջուրն ու ուտելիքը: Այլեւս ձի չունի. մնացել են օկուպացված հայրենիքում: Բայց ինքը գիտի, որ արժանապատիվ ձիավորը երբեք աննժույգ չի մնում»,- ասաց Ասպրամ Կրպեյանը:
Պատգամավորի խոսքով՝ անկասելի եւ ամուր է նաեւ իրենց պայքարը: «Մենք Աղավնոյի եւ Նռնաձորի մեր արժանապատիվ քաղաքացիներին մենակ թողնելու իրավունք չունենք: Իրենցից փորձել են հայրենիք ու արժանապատվություն խլել, բայց հայը շարունակելու պայքարել հանուն իր հայրենիքի, որովհետեւ չկա առավել բարձր արժեք հայրենիքից»,- ընդգծեց Ասպրամ Կրպեյանը:
