նախընտրելի դարձնել«Համախմբում» շարժման անդամ, հասարակական-քաղաքական գործիչ Ավետիք Չալաբյանը կմնա կալանքի տակ։ Կիրակի օրը` ս.թ. հուլիսի 10-ին, Երևան քաղաքի ընդհանուր իրավասության դատարանը (նախագահությամբ դատավոր Արուսյակ Ալեքսանյանի) հրապարակել է իր որոշումը, որով մասնակի բավարարել է վարույթն իրականացնող մարմնի ներկայացրած կալանքի երկարաձգման միջնորդությունը։
«Ես ինչպե՞ս կարող եմ վարույթին խոչընդոտել, եթե վարույթն ավարտել եք: Ի՞նչ կարող եմ ես անել: Եթե դուք վարույթն ավարտել եք, ուրեմն դատախազի կողմից առաջարկված գործողությունները փաստացի ավարտել եք, արդեն չկա որևէ տրամաբանական գործողություն, որին ես կարող եմ խոչընդոտել: Իմիջիայլոց, ոչ էլ ցանկություն ունեմ: Այս գործի նյութերը բավարար են, որովհետև այս գործի նյութերը ցանկացած խելամիտ դատարանում ի վերջո կբերեն իմ արդարացման, այս քայլերը հերթով կբերեն նրան, որ հանցակազմը բացակայում է»,- կալանքի երկարացման դռնբաց նիստում իր ավարտական ելույթի ժամանակ ասել է Ավետիք Չալաբյանը:
Նշենք, որ ավելի վաղ Ավետիք Չալաբյանի կալանքը երկարաձգելու համար հապճեպ միջնորդություն էր ներկայացվել դատարան այն բանից հետո, երբ դատավարական ղեկավարում իրականացնող դատախազը չէր հաստատել գործի մեղադրական եզրակացությունը և վարույթի նյութերը վերադարձրել էր նախաքննության մարմին` նախաքննությունը շարունակելու ցուցումով։
«Ի՞նչ է նշանակում փախուստ մի մարդու համար, որը հինգ ընկերությունների տնօրենների խորհրդի անդամ է, երկու բարեգործական հիմնադրամների հոգաբարձուների խորհրդի անդամ է, մեծ ընտանիքի հայր է, չորս երեխաների հիմնական կերակրող, երկու տարեց ծնողների խնամակալ: Գրել եք այս ամենը ընդամենը գրելու համա՞ր: Ո՞նց ես կարող եմ փախուստի դիմել: Ինքս ինձանից ես կարո՞ղ եմ փախուստի դիմել: Մի մարդ, որ Հայաստան է վերադարձել պատերազմի օրերին երեք տղա երեխաներով: Մեր երկրի բնակչության զգալի մասը իր երեխաների փախցնում է: Երեք տղա երեխաներով Հայաստան եմ վերադարձել, որ փախնե՞մ Հայաստանից»,- ասել է Ավետիք Չալաբյանը, հավելելով, որ այս միջնորդությունը ցանկացած երկրում իրավական պրակտիկայում ուղղակի զավեշտ կլիներ:
Հիշեցնենք, որ 2022թ․ մայիսի 12-ին Ավետիք Չալաբյանի նկատմամբ սկսվել է քրեական հետապնդում քրեական գործի շրջանակներում, որը հարուցվել է ՀՀ քրեական օրենսգրքի 163-րդ հոդվածի 3-րդ մասի 2-րդ կետով, որը նախատեսում է պատասխանատվություն Հավաքին մասնակցելուն հարկադրելը կամ հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելու համար՝ կատարված երկու կամ ավելի անձանց նկատմամբ: Նա կալանավորվել է:
«Ավետիք Չալաբյանը գործող իշխանությունների քաղաքական պատանդն է, իսկ դատարանները դրանց կատարածուները: Քննիչն իր բերանով երեկ հաստատեց, որ Ավետիք Չալաբյանը պետք է մնա կալանքի տակ միայն նրա համար, որ ինքն ու դատախազը հանգիստ , առանց վռազելու գործն ուղարկեն դատարան և ընդունեց, որ որևէ այլ քննչական գործողություն չունեն անելու, ասել է թե` Ավետիք Չալաբյանը շարունակելու է գտնվել կալանքի տակ գործը դատարան ուղարկելու հիմքով»,-ավելի վաղ հայտարարել էին Չալաբյանի պաշտպաններ Վարազդատ Հարությունյանը և Արթուր Հարությունյանը:
Ավետիք Չալաբյանի ազատության համար ամիսներ շարունակ պայքարում են լայն հասարակության տարբեր խմբեր` ակցիաներով, ստորագրահավաքներով և օրենքով սահմանված բոլոր միջոցներով կոչ անելով ազատել Ավետիք Չալաբյանին:
