նախընտրելի դարձնելՄարտավարական տեսանկյունից ադրբեջանական զինուժը փորձում է սահմանային ճշգրտումներ կատարել եւ դիրքեր է հաստատում նախկին ԼՂԻՄ-ի եւ իրենց վերահսկողության տակ անցած տարածքների միջեւ սահմանին։ Այս մասին NEWS.am-ի թղթակցի հետ զրույցում ասաց ԱԺ «Հայաստան» խմբակցության քարտուղար, երկրի պաշտպանության նախկին նախարար Սեյրան Օհանյանը։
Ադրբեջանցիները, նրա խոսքով, ցանկանում են Արցախը բերել ավելի խորը եւ ընդգրկուն շրջապատման մեջ դնել։
«Որքան ավելի վատանա Արցախի անկլավային իրավիճակը, այնքան Թուրքիայի եւ Ադրբեջանի համար ավելի հեշտ կլինի ճնշում գործադրել եւ իրականացնել իրենց հեռահար նպատակները, այն է՝ հայաթափել Արցախը, ճնշում գործադրել Արցախի ժողովրդի վրա։ Իսկ ռազմավարական նպատակն է շարունակել ճնշում գործադրել Հայաստանի վրա, էլ ավելի ճզմել ու բացել ճանապարհները նրա միջով, կամ, ինչպես իրենք են ասում, ապաշրջափակել Սյունիքով անցնող ճանապարհները։ Դա կբերի նրան, որ մենք կհայտնվենք նաեւ տնտեսական եւ աշխարհագրական ճնշման տակ։ Բացի այդ, Սյունիքի եւ Հայաստանի այլ վայրերում ժողովրդագրական պատկերը փոխելու փորձեր կլինեն»,- պարզաբանեց նա։
Օհանյանը համոզմունք հայտնեց, որ դա նրա արդյունքն է, որ որ Հայաստան-Ռուսաստան, Հայաստան-Արցախ եւ Արցախ-ռուսական խաղաղապահ կոնտինգենտ բանակի համագործակցությունն այն մակարդակի վրա չէ, որին պետք է լիներ։ Եթե Ադրբեջանն այդպիսի սադրանքների է գնում, ուրեմն դա այդպես է։
«Հակառակ դեպքում կհստակեցվեին այն ռազմավարական կետերն ու բարձունքները, որոնք պետք է գրավել Արցախի ժողովրդի անվտանգությունն ապահովելու համար։ Չնայած Արցախում ռուս խաղաղապահների առկայությանը՝ ՊԲ-ն ավելի լավ է տիրապետում Արցախի աշխարհագրական առանձնահատկություններին եւ պետք է ձեռնարկեր բոլոր քայլերը, որպեսզի բոլոր կարեւոր բարձունքները գրավվեն եւ չհայտնվեն Ադրբեջանի ճնշման տակ։
Հայաստանը եւ Արցախը փոխադարձ համագործակցության հիման վրա պետք է հզորացնեին հայկական զինված ուժերը, աջակցեին Արցախի պաշտպանության բանակին մարտունակության վերականգնման գործում, գծեին Հայաստանի սահմանները եւ կազմակերպեին պաշտպանությունը մեր շահերից ելնելով։ Հայաստանի իշխանություններն այս ամենի մասին հավանաբար չեն մտածել։ Նրանք չեն հասկանում, որ այս տարածքներում օր ու գիշեր պետք է քրտնաջան աշխատել, մինչդեռ իրենց գործողությունները միտված են միայն ոստիկանական զորքերի քանակի ուռճացմանը՝ իրենց աթոռները պահելու համար։ Դա անընդունելի է»,- եզրափակեց խմբակցության ղեկավարը։
Հիշեցնենք, որ օգոստոսի 1-ին՝ ժամը 09:00-ից, Արցախի Հանրապետության հյուսիսային եւ հյուսիսարեւմտյան սահմանագոտու մի շարք հատվածներում ադրբեջանական ստորաբաժանումները սադրանք էին ձեռնարկել՝ շփման գիծը հատելու փորձեր ձեռնարկելով, որենք ճնշվել են պաշտպանության բանակի կողմից:
Ադրբեջանական ստորաբաժանումների սադրանքների արդյունքում վիրավորվել է Արցախի պաշտպանության բանակի զինծառայող Ալբերտ Վլադիկի Բախշյանը։
Միջադեպի մասին մանրամասն տեղեկությունը փոխանցվել է ռուսական խաղաղապահ ուժերի հրամանատարությանը։
