Թուրքիայի Ազգային մեծ ժողովը (խորհրդարանը) հինգշաբթի ստացել է Ադրբեջանում թուրք զինվորականների մանդատը մեկ տարով երկարացնելու մասին օրինախագիծը, հայտնում է Անատոլիական գործակալությունը։

Նախագահ Ռեջեփ Թայիփ Էրդողանի կողմից ստորագրված փաստաթղթում ասվում է, որ թուրք զինվորականները շարունակում են իրենց ներդրումն ունենալ  Ադրբեջանի դեօկուպացված տարածքներում կայունության ապահովման համար՝  2020 թվականի նոյեմբերի 9-ի եռակողմ հայտարարության հետ կապված։

«Թուրքիան այսօր էլ զգալի ներդրում է կատարում տարածաշրջանում խաղաղության ու կայունության պահպանման ու ամրապնդման, ինչպես նաեւ Ադրբեջանի ազատագրված տարածքների վերականգնման գործում»,- ասվում է փաստաթղթում։

Օրինագծի համաձայն՝ Ադրբեջանում թուրք զինվորականների մանդատը նախատեսվում է երկարացնել մեկ տարով՝  սկսած 2022 թվականի հոկտեմբերի 17-ից։