նախընտրելի դարձնել
Հայաստանի պաշտպանության նախարարության կողմից մշակված զինծառայողների ատեստավորման ծրագիրը՝ նրանց աշխատավարձի հետագա բարձրացմամբ, թույլ կտա միանգամից մի քանի խնդիր լուծել։ Այս մասին նոյեմբերի 3-ին Ազգային ժողովում պաշտպանության եւ անվտանգության մշտական խորհրդարանական հանձնաժողովի նիստում «Պետական պաշտոններ զբաղեցնող անձանց, ինչպես նաեւ քաղծառայողների վարձատրության մասին» օրենքում լրացումներ եւ հարակից օրենքներում փոփոխություններ կատարելու մասին օրինագծերի փաթեթի քննարկման ժամանակ ասաց պաշտպանության նախարար Սուրեն Պապիկյանը։
Այսպես, ըստ նախարարի, սա թույլ կտա նրանց համար ընդունելի սոցիալական պայմաններ ապահովել, բարձրացնել գիտելիքների եւ պատրաստվածության մակարդակը։
Այս նախաձեռնությունը, ինչպես նշեց պաշտպանության գերատեսչության ղեկավարը, այս տարվա հոկտեմբերին ներկայացվել եւ հավանության է արժանացել կառավարության կողմից։ Մի խոսքով, փոփոխությունների փաթեթը նախատեսում է պայմանագրայինների ատեստավորում։ Դրա հաջող ավարտից հետո զինծառայողները հնարավորություն են ստանում զգալիորեն բարձրացնել իրենց աշխատավարձը։ Նախագծի հեղինակների կարծիքով՝ փոփոխությունները մի կողմից թույլ կտան բարձրացնել զինվորականների գիտելիքների մակարդակը, իսկ մյուս կողմից՝ կլուծեն նրանց սոցիալական խնդիրները։
«Արդյունքում նախատեսվում է ստանալ ժամանակակից բանակ եւ բարձր վարձատրվող զինծառայողներ։ Ատեստավորումն ի սկզբանե կամավոր կլինի, սակայն այն հաջողությամբ անցած զինվորականները երեք տարի անց պարտավոր կլինեն նորից անցնել: Սա արվում է զինվորականներին մարզավիճակում պահելու համար»,- պարզաբանեց Պապիկյանը։
Գերատեսչության ղեկավարը, մասնավորապես, հայտնեց, որ եթե շարքային-պայմանագրային զինծառայողը, որը մարտական հերթապահություն չի իրականացնում, այսօր ստանում է ամսական միջինը 155 000 դրամ, իսկ մարտական հերթապահության մեջ գտնվողը՝ մոտ 200 000 դրամ, ապա ատեստավորումից հետո առաջինը կստանա մոտ 215 000 դրամ (եւ սա առանց հարկերի), իսկ երկրորդը՝ մինչեւ 300 000 դրամ։
Երեք տարվա համար, որը հենց այն ժամանակահատվածն է, որը հատկացված է բարեփոխումների լիարժեք իրականացման համար, կառավարությունը նախատեսում է ծախսել մոտ 66 մլրդ դրամ։
«Եթե զինծառայողն առաջին փորձով չկարողանա հանձնել ատեստավորումը, ապա մեկ տարվա ընթացքում նա կարող է կրկնել այն։ Ատեստավորումն իրականացնելու համար կձեւավորվեն երեք հանձնաժողովներ՝ պաշտպանության նախարարի հանձնաժողով, գլխավոր շտաբի հանձնաժողով եւ կորպուսային հանձնաժողով։ Նախարարի հանձնաժողովում ատեստավորում կանցնեն ավագ եւ բարձրագույն սպայական կազմերը։ Միջին օղակի սպաները քննություն կհանձնեն Գլխավոր շտաբի հանձնաժողովում, իսկ կրտսեր սպայական եւ շարքային կազմը՝ կորպուսային հանձնաժողովում։ Անհրաժեշտության դեպքում ատեստավորման որակն ու օբյեկտիվությունն ապահովելու համար կարող են ներգրավել այլ պետական հաստատությունների աշխատակիցներ»,- ասաց նախարարը։
Բավական երկար քննարկումներից հետո օրենսդրական նախաձեռնությունը դրական եզրակացություն ստացավ մշտական խորհրդարանական հանձնաժողովի կողմից։
