նախընտրելի դարձնել
Բահրեյնի թագավորի դիվանագիտական խորհրդական շեյխ Խալիդ բն Ահմեդ Ալ Խալիֆան հայտարարել է, որ Բահրեյնը կշարունակի հարաբերություններ կառուցել Իսրայելի հետ՝ Իսրայելի համընդհանուր ընտրություններում նախկին վարչապետ Բենիամին Նեթանյահուի եւ նրա աջակողմյան դաշնակիցների հաղթանակից հետո, հայտնում է Reuters լրատվական գործակալությունը։
Արաբական առաջնորդները մեծ մասամբ լռել են Նեթանյահուի հաղթանակի մասին, ում կոշտ հակազդեցությունն Իրանին օգնել է կապեր հաստատել Պարսից ծոցի սուննի մուսուլման առաջնորդների հետ: Իսրայելը, Նեթանյահուի կառավարության օրոք, 2020 թվականին, կարգավորել է հարաբերությունները Արաբական Միացյալ Էմիրությունների եւ Բահրեյնի հետ՝ ԱՄՆ միջնորդությամբ կնքված «Աբրահամի համաձայնագիր» կոչվող փաստաթղթերի միջոցով:
Խորհրդականի խոսքով՝ Նեթանյահուի հաղթանակը «նորմալ էր եւ միշտ սպասված»։ «Մենք համաձայնագիր ունենք Իսրայելի հետ, որը Աբրահամի համաձայնագրի մաս է, եւ մենք հավատարիմ կմնանք մեր համաձայնությանը: Մենք ցանկանում ենք օրինակ ծառայել եւ հաջողության հասնել միասին ու դիմակայել բոլոր սպառնալիքներին»,- ասել է նա՝ պատասխանելով Իսրայելին ներառող անվտանգությանը բազմակողմ տարածաշրջանային մոտեցման մասին հարցին։
ԱՄՆ-ի եւ Իսրայելի պաշտոնյաները բարձրացրել են Մերձավոր Արեւելքում հակաօդային պաշտպանության ինտեգրված համակարգի գաղափարը՝ ԱՄՆ նախագահ Ջո Բայդենի Իսրայել եւ Սաուդյան Արաբիա կատարած հուլիսյան այցի ժամանակ:
«Մենք կցանկանայինք համոզվել, որ ստիպված չենք լինի հասնել այն օրը, որ բախվենք տարածաշրջանի անվտանգության որեւէ տեսակի վատթարացմանը», - ասել է բահրեյնցի Շեյխ Խալիդը, որի երկրում տեղակայված է ԱՄՆ ռազմածովային ուժերի հինգերորդ նավատորմը:
