Վաղ առավոտից ադրբեջանցիների կողմից փակված Ստեփանակերտ-Գորիս մայրուղուց կանայք եւ երեխաները տեղափոխվել են Ստեփանակերտ, իսկ տղամարդիկ կգիշերեն այնտեղ: Այս մասին NEWS.am-ի հետ զրույցում ասաց «Հանուն Արցախի պաշտպանության» շարժման համակարգող խորհրդի անդամ Արշակ Աբրահամյանը։

Արշակ Աբրահամյանի փոխանցմամբ՝ ճանապարհի բացմանը 100 ավելի մարդիկ են սպասում, ավտոմեքենաների հերթը 1 կմ-ից ավելի է:

«Վերածննդի հրապարակի հանրահավաքի ժամանակ մեզ միացան քաղաքային կառույցի ներկայացուցիչ, խորհրդրանական եւ արտախորհրդանական կուսակցությունների անդամներ, եւ մենք ընդհանուր առմամբ համաձայնության եկանք: Հուսով ենք՝ մինչեւ առավոտ իրավիճակը կփոխվի, եթե ոչ, մենք կդիմենք միջազգային հանրությանը՝ ադրբեջանական ագրեսիան սանձելու կոչով: Իրենք բնապահպանական պատճառաբանությամբ այդ կենսական անհրաժեշտություն ունեցող ճանապարհը փակում են, երբ ուզում՝ ստեղծելով հումանիտար ճգնաժամ: Այս ամենին վերջ պետք է տրվի»- նշեց Աբրահամյանը:

Հիշեցնենք, որ քաղաքացիական հագուստներով մի խումբ ադրբեջանցիներ, կրկին բնապահպանական պատճառաբանությամբ, այսօր առավոտյան ժամը 10:30-ի հատվածում փակել են Ստեփանակերտ-Գորիս մայրուղին: Արցախի ՆԳՆ-ն էլ հայտնել էր, որ Լիսագոր-Շուշի եւ Ստեփանակերտ-Շուշի ավտոճանապարհին 100-ավոր քաղաքացիներ մնացել են ճանապարհին։