Եվրահանձնաժողովի ղեկավար Ուրսուլա ֆոն դեր Լյայենը Ադրբեջանի, Վրաստանի, Հունգարիայի եւ Ռումինիայի միջեւ կանաչ էներգետիկայի մասին համաձայնագրի ստորագրման ժամանակ հերթական անգամ հանդես է եկել ելույթով, որի ժամանակ հիշատակել է իր «հուսալի էներգետիկ գործընկեր» Ադրբեջանին։

«Այս համաձայնագիրը Եվրամիությանը կմոտեցնի Հարավային Կովկասի տարածաշրջանում մեր գործընկերոջը եւ կօգնի մեր տարածաշրջաններին անցում կատարել էկոլոգիապես մաքուր էներգետիկայի: Ռուսաստանի հետ պատերազմի մեկնարկից սկսած՝ մենք որոշել ենք երես թեքել ռուսական հանածո վառելիքից եւ դիվերսիֆիկացվել դեպի հուսալի էներգետիկ գործընկերներ, ինչպիսիք են այստեղ ներկա մեր գործընկերները»,- ասել է ֆոն դեր Լյայենը՝ նկատի ունենալով համաձայնագիրը կնքած երկրներին։

Նա ասել է, որ ԵՄ-ն պատրաստ է ֆինանսական աջակցություն ցուցաբերել ծրագրին՝ մինչեւ տեխնիկատնտեսական հիմնավորման արդյունքներ ստանալը։

«Էներգիայի վերականգնվող աղբյուրների աճող մասնաբաժինը ինտեգրելու համար մեզ իսկապես անհրաժեշտ են ավելի ամուր էլեկտրական միացումներ: Հենց այդ պատճառով այդքան կարեւոր է Ռումինիայի, Վրաստանի եւ Ադրբեջանի միջեւ սեւծովյան էներգետիկ մալուխը»,- ասել է ֆոն դեր Լյայենը։

Նրա խոսքով՝ սեւծովյան մալուխը կարող է Վրաստանը վերածել էլեկտրաէներգիայի կենտրոնի եւ ինտեգրել նրան ԵՄ ներքին էլեկտրաէներգիայի շուկայում, ինչպես նաեւ օգնել սկսել Ուկրաինայի էներգետիկ համակարգի վերականգնումը եւ աջակցել երկրի վերակառուցմանը։

Հիշեցնենք, որ այսօր՝ դեկտեմբերի 17-ին, Հունգարիայի, Ռումինիայի, Վրաստանի եւ Ադրբեջանի ղեկավարները պայմանագիր են կնքել կանաչ էներգետիկայի մասին, որը կարող է էներգիայի նոր աղբյուր դառնալ Եվրամիության համար՝ էներգակիրների մատակարարման ճգնաժամի պայմաններում:

Համաձայնագիրը նախատեսում է Սեւ ծովի տակով մալուխի անցկացում, որը Ադրբեջանին կմիացնի Հունգարիայի հետ՝ Վրաստանի եւ Ռումինիայի տարածքով։

Ադրբեջանը նախատեսում է ծովային հողմակայաններից էլեկտրաէներգիա արտահանել Եվրոպա՝ Վրաստանով։