նախընտրելի դարձնելԵրեւանի ընդհանուր իրավասության դատարանի Կենտրոնի նստավայրում՝ նախագահությամբ դատավոր Ջոն Հայրապետյանի, այսօր՝ փետրվարի 16-ին, զորամասերից մեկի գումարտակի հրամանատար, ժամկետային եւ կրտսեր սպայական կազմի պետ Իշխան Վահանյանի գործով դատական նիստին հարցաքննվեց գործով վկա, շարքային զինծառայող Մոնթե Պողոսյանը:
Նա դատարանում պատմեց, որ Խուռհատ սարում տեղի ունեցած մարտի մեկնարկից մեկ ժամ անց վիրավորում է ստացել գլխի շրջանում.
«Փամփուշտ քերծել էր ճակատային մասը, արյունահոսում էի, աչքերիս դեմը չէի տեսնում, ականջներս էլ էր խլացել: Պառկել եմ սարի վրա, այդ ժամանակ գիտակցության եկա: Մոտ 3 Ուրալ է եղել, հիմնականում վիրավոր զինվորներին էին տեղափոխում, ես երկրորդ Ուրալում եմ եղել»,- պատմեց նա:
Դատավորի հարցին՝ երբ Խնձորեսկի հոսպիտալում տեսել է Իշխան Վահանյանին, արդյո՞ք ճանաչել է, խոսե՞լ են իրար հետ, վկան ասաց, որ ճանաչել է, սակայն չի խոսել:
«Մի քիչ կաղալով տեսնում եք ձեր գումարտակի հրամանատարին, չե՞ք ասում՝ այ գումարտակի հրամանատար, ինձ հետ ուղարկի, ես լավ եմ, ո՞նց են տղերքը»,- զարմացած հարցրեց դատավորը:
«Չէ, չեմ հարցրել, երբ գնացել պառկել եմ, մյուս օրը ինքն իմ կողքն է պառկած եղել, բայց չեմ հարցրել»,- պատասխանեց գործով վկան:
Վկան պատմեց, որ Վահանյանն իր կողքին պառկել է 2 օր, ապա տեղափոխվել:
44-օրյա պատերազմում զոհված զինծառայողներից մեկի հայրը վկային հարց ուղղեց՝ արդյո՞ք եղել է դեպք, որ Հադրութի դպրոցում սպաների եւ զինծառայողների միջեւ վիճաբանություն տեղի ունենա, վկան ասաց. «Երբ իջել ենք դպրոց, դահլիճ է եղել, այդտեղ էին բոլորին հավաքել, ասացին, որ պետք է գնանք մարտական գործողություններ իրականացնենք, բայց մեծ վեճ չեմ հիշում»:
Զոհվածի հոր հարցին՝ այդ ընթացքում զինծառայողները սպաներին ասե՞լ են, որ տեղխնիկա տրամադրեն իրենց, վկան ասաց, որ եղել է այդպիսի դեպք:
Հարցին՝ սպաները ի՞նչ են պատասխանել, վկան ասաց, որ ասել են՝ ով զենք չունի, կտան:
Ծնողի հարցին՝ սպաներն ասե՞լ են, թե նորակոչիկներին տանում են ապահով վայր, վկան ասաց՝ այո:
Հարցին՝ Իշխան Վահանյանի նկատմամբ եղե՞լ է անվստահություն, վկան ասաց. «Եղել է, որովհետեւ մտածում էինք, որ մեզ առանց ասելու ինչ-որ տեղ են տանում»:
Նշենք, որ ըստ մեղադրանքի՝ Իշխան Վահանյանը 2020թ. հոկտեմբերի 9-ից նշանակված լինելով որպես ՊԲ համապատասխան զորամասի 5-րդ հրաձգային գումարտակի հրամանատար, կոչումով մայոր, ծառայողական դիրքով եւ կոչման բերումով հանդիսանալով նույն գումարտակի ժամկետային եւ կրտսեր սպայական կազմի ուղղակի պետը, 2020թ. սեպտեմբերի 27-ին ռազմական դրության պայմաններում 2020 թվականի հոկտեմբերի 10-ին՝ ժամը 12:00-ի սահմաններում, Արցախի Հանրապետության Հադրութ քաղաքի մոտակայքում գտնվող Խուռհատ սարի վրա տեղի ունեցած մարտական գործողություններին ակտիվ մասնակցություն չունենալու եւ սեփական կյանքը չվտանգելու անձնական շահագրգռվածությունից ելնելով՝ դրսեւորել է իշխանության անգործություն՝ չի կատարել իր վրա ՀՀ ԶՈՒ ներքին ծառայության կանոնագրքով եւ ՀՀ ԶՈՒ մարտական կանոնադրությամբ դրված պարտականությունները, որն անզգուշությամբ առաջացրել է ծանր հետեւանքներ, այն է՝ Արցախի Հանրապետության պաշտպանության բանակի համապատասխան զորամասի 5-րդ հրաձգային գումարտակի մի շարք զինծառայողներ զոհվել են, անհայտ կորել, գերեվարվել, ինչպես նաեւ՝ ստացել տարբեր աստիճանի մարմնական վնասվածքներ:
Բացի այդ, Իշխան Վահանյանը, ծառայողական դիրքով եւ կոչման բերումով հանդիսանալով նույն գումարտակի ժամկետային եւ կրտսեր սպայական կազմի ուղղակի պետը, 2020 թվականի հոկտեմբերի 10-ին՝ ժամը 12:00-ի սահմաններում, Արցախի Հանրապետության Հադրութ քաղաքի մոտակայքում գտնվող Խուռհատ սարի վրա տեղի ունեցած մարտի ժամանակ ինքնակամ լքել է մարտադաշտ հանդիսացող՝ վերոնշյալ տեղանքի մարտական դիրքը:
5-րդ գումարտակի անձնակազմը մնալով առանց պատշաճ հրամանատարական ղեկավարման եւ կապի միջոցի, մատնվել է խուճապի, փորձել է հնարավոր միջոցներով եւ եղանակներով պաշտպանվել, սակայն համակարգված մարտական գործողություններ վարելու եւ միասնական ղեկավարման բացակայության պայմաններում դա նրանց չի հաջողվել, որպիսի պայմաններում հնարավորություն չունենալով վերադաս շտաբից տեղեկանալ հակառակորդի կողմից Հադրութ քաղաք ներթափանցելու վերաբերյալ, գումարտակի անձնակազմի մի մասը նահանջել է նշված քաղաքի ուղղությամբ, որոնցից, ի թիվս այլոց, զոհվել են պարտադիր ժամկետային զինծառայողներ Տիգրան Ագանեսյանը, Նարեկ Ղազարյանը, Հարութ Ղարախանյանը, Սուրեն Խեչումյանը, Էրիկ Մարտիրոսյանը, Արտաշես Այվազյանը, Հայկ Հարությունյանը, Սասուն Պետրոսյանը, Ալբերտ Ստեփանյանը, Սամվել Սամբատովը, Կարեն Ներսեսյանը, Գրիշա Գրիգորյանը, Դավիթ Ադոյանը, Արտյոմ Մկրտչյանը, Արման Գաբրիելյանը եւ Ռաֆիկ Սահակյանը, հակառակորդի կողմից գերեվարվել են Էրիկ Գասպարյանը, Ալբերտ Գրիգորյանը, Նարեկ Սիրունյանը, Էրիկ Խաչատրյանը, Ռոբերտ Վարդանյանը, Կարեն Մանուկյանը եւ Արայիկ Գալստյանը, տարբեր աստիճանի մարմնական վնասվածքներ են ստացել պարտադիր ժամկետային զինծառայողներ Արման Արմաղանյանը, Արթուր Հարությունյանը, Նիկոլայ Ստեփանյանը, Դավիթ Սահակյանը, Արսեն Այվազյանը, Ռուսլան Թումանյանը, իսկ պարտադիր ժամկետային զինծառայող Արթուր Ալեքսանյանի գտնվելու վայրը մինչ օրս հայտնի չէ:
Իշխան Արմենի Վահանյանին մեղսագրվում է հանցավոր արարքների կատարում, որոնք նախատեսված են ՀՀ ՔՕ 375-րդ հոդվածի 4-րդ մասով եւ 380-րդ հոդվածի 1-ին մասով:
