ԱՄՆ-ն եւ դաշնակիցները Իրանը դիտարկելու են որպես գլոբալ սպառնալիք՝ զգուշացնելով, որ Ռուսաստանի հետ աճող դաշինքը եւ «Ուկրաինայի պատերազմում համագործակցությունը նշանակում է, որ Թեհրանի ապակայունացնող գործունեությունը ավելի մեծ վտանգ կներկայացնի, քան նախկինում երբեւէ», - ասել է Պենտագոնը։

«Մենք այժմ գտնվում ենք մի փուլում, երբ իրանական սպառնալիքներն այլեւս հատուկ չեն Մերձավոր Արեւելքին, այլ գլոբալ խնդիր», - լրագրողներին ասել է պաշտպանության փոխնախարար Դանա Սթրոլը:

Սթրոլը մատնանշել է Թեհրանի եւ Մոսկվայի միջեւ ռազմական համագործակցության ընդլայնումը եւ, մասնավորապես, «Իրանի կողմից անօդաչու թռչող սարքերի տրամադրումը ռուս զինվորականներին»՝ «գլոբալ կոալիցիային կոչ անելով հակահարված տալ Իրանի եւ Ռուսաստանի միջեւ չարամիտ համագործակցությանը»:

«Խելամիտ է ակնկալել, որ մարտավարությունը, տեխնիկան եւ ընթացակարգերը, որոնք իրանցիները սովորում եւ կատարելագործում են Ուկրաինայում, մի օր կվերադառնան Մերձավոր Արեւելքի մեր գործընկերներին, այդ իսկ պատճառով մենք այժմ ընդլայնում ենք համագործակցությունը, փոխանակում ենք հետախուզական տվյալները, հասկանում այս ցանցերը եւ ավելացնելով մեր հավաքական պաշտպանական կարողությունները, որպեսզի մենք պատրաստ լինենք դիմակայել այդ սպառնալիքներին տարածաշրջանում», - ասել է նա։

Հիշեցնենք, որ Իրանը բազմիցս հերքել է անօդաչու թռչող սարքերը Ռուսաստան տեղափոխելու մասին տեղեկությունները՝ Ուկրաինայում դրանց օգտագործման համար։ Ավելին, բոլորովին վերջերս Իրանը հայտարարություն է տարածել՝ Արեւմուտքին կոչ անելով «դադարեցնել Թեհրանի հասցեին անարդյունք մեղադրանքները»։