ՆախընտրելիՉի կարելի, որ Ղարաբաղի խորհրդարանի պատգամավորները, Ղարաբաղի խորհրդարանի նախագահը Հայաստանին գնահատականներ տան, մենք նրանց օգնում ենք։ Պետք է ըմբռնումով վերաբերեն եւ հակառակ քայլերի չդիմեն։ Այս մասին մայիսի 19-ին լրագրողների հետ զրույցում ասաց իշխող «Քաղաքացիական պայմանագիր» խմբակցության պատգամավոր Վիգեն Խաչատրյանը։
Ըստ նրա՝ փորձը ցույց է տալիս, որ երբ Ղարաբաղի իշխանությունները համագործակցում էին Հայաստանի իշխանությունների հետ, հաջողվում էր արդյունքի հասնել, իսկ երբ հակադրվում են իրար, խնդիրներ են առաջանում։
«Այդպես եղավ 1997 թվականին, երբ Արցախը հակադրվեց Հայաստանի իշխանություններին, եւ մենք ստացանք այն, ինչ ունենք։ Էդ այդ ժամանակ չհակադրվեին, մենք այդ ժամանակ լուծումը գտել էինք: Հիմա էլ նույնն է:
Եթե Հայաստանի իշխանությունները որոշումներ են կայացնում, ապա Արցախը պետք է հասկանա պատճառները եւ չհակադրվի։ Եթե չեն կարողանում օգնել, ապա պետք է գոնե չխանգարեն կամ ինքնուրույն լուծեն իրենց հարցերը»,- նկատեց պատգամավորը։
Նրա խոսքով, այն, ինչ այսօր կատարվում է Արցախում, շատ վտանգավոր է եւ Հայաստանի իշխանությունների նկատմամբ անհարգալից վերաբերմունքի արդյունք է։
Խաչատրյանը համոզմունք հայտնեց, որ այն, ինչ այսօր կատարվում է, արտաքին ուժերի սադրանք է:
