Թուրքիայի նորանշանակ արտգործնախարար Հաքան Ֆիդանը հեռախոսազրույց է ունեցել իր եգիպտոսցի գործընկեր Սամեհ Շուքրիի հետ՝ երկկողմ հարաբերությունները քննարկելու նպատակով։ Այս մասին հայտնում է Անադոլուն՝ վկայակոչելով դիվանագիտական ​​աղբյուրները:

Շուքրին նաեւ շնորհավորել է Ֆիդանին պաշտոնը ստանձնելու կապակցությամբ։  

Այս շաբաթվա սկզբին է Ֆիդանն ընդունել արտաքին գերատեսչության ղեկավարումն իր նախորդ Մեվլութ Չավուշօղլուից: Մինչեւ այդ նա 13 տարի գլխավորում էր Թուրքիայի ազգային հետախուզական կազմակերպությունը (MIT):

Ապրիլին Թուրքիայի այն ժամանակվա արտաքին գործերի նախարար Չավուշօղլուն հայտարարել էր, որ Թուրքիան եւ Եգիպտոսը պայմանավորվել են բարելավել երկկողմ կապերը եւ բարձրագույն մակարդակի բարձրացնել դիվանագիտական ​​հարաբերությունները:

Թուրքիայի եւ Եգիպտոսի միջեւ դիվանագիտական ​​հարաբերությունները 2013 թվականից ի վեր ժամանակավոր հավատարմատարների մակարդակում են: