ՆախընտրելիՀայաստանում գտնվող Քուվեյթի Պետության ֆինանսների նախարար Մուստաֆա Ջասեմ ալ-Շամալիի գլխավորած պատվիրակությունն այցելել է Գեղարքունիքի եւ Տավուշի մարզեր, ծանոթացել զբոսաշրջային, արտադրական ներուժին ու հնարավորություններին:
Տավուշում այցելել են Դիլիջանի հանքային ջրերի գործարան, ծանոթացել արտադրական հզորություններին ու կարողություններին, հանդիպել մարզի ղեկավարության հետ: Տեղերում քննարկվել են արտադրանքի արտահանման հնարավորությունների հետ կապված հարցեր:
Պատվիրակությունն այցելել է պատմամշակության վայրեր, մասնավորապես` եղել Հաղարծինի վանական համալիրում: Նրանց ներկայացվել են Հայաստանում զբոսաշրջության ոլորտում իրականացվող ծրագրերը, ներդրումային միջավայրը: Քննարկվել են փոխգործակցության, համատեղ նախագծերի իրականացման հեռանկարները:
Հիշեցնենք, որ Երեւանում հոկտեմբերի 5-ին կայացած Հայ-քուվեյթական միջկառավարական հանձնաժողովի առաջին նիստում, որի համանախագահը քուվեյթական կողմից ֆինանսների նախարարն է, կարեւորվել էր երկկողմ առեւտրատնտեսական հարաբերությունների խորացումն ու ընդլայնումը: Պատվիրակության կազմում են գործարարներ, որոնք հետաքրքրված են Հայաստանի հետ փոխշահավետ ծրագրերի իրականացմամբ:
