նախընտրելի դարձնելԱդրբեջանի կողմից առնվազն տարօրինակ է լսել սպառազինության մրցավազք հրահրելու վերաբերյալ Հայաստանի հասցեին արված մեղադրանքները: Այս մասին NEWS.am-ի թղթակցի հետ զրույցում ասաց ԱՊՀ երկրների ինստիտուտի փորձագետ Միխայիլ Ալեքսանդրովը` մեկնաբանելով Ադրբեջանի ԱԳՆ անվտանգության կառավարման երկրորդ քարտուղար Էլչին Հուսեյնլիի այն հայտարարությունը, թե «Հայաստանն Ադրբեջանից ավելի ինտենսիվ է սպառազինվում» եւ որ «Երեւանը պատրաստվում է ոչ թե խաղաղության, այլ պատերազմի»:
«Սա բավականին կասկածելի քաղաքականություն է: Հենց Ադրբեջանն է սպառազինությունների մրցավազք հրահրում եւ հպարտանում իր ռազմական բյուջեով: Հենց Բաքուն է պնդում, թե ռազմական լուծումը բացառված չէ: Ուստի Հայաստանին սպառազինությունների մրցավազքի խթանման մեջ մեղադրելն առնվազն տարօրինակ է», - նշեց փորձագետը` ավելացնելով, որ Ադրբեջանին անհրաժեշտ է ընդհանրապես վերանայել իր մոտեցումը:
«Ադրբեջանը պետք է դադարեցնի հայկական դիրքերի գնդակոծումը, ինչպես նաեւ դադարի պարծենալ իր ռազմական բյուջեով: Այդ երկրում այնքան էլ լավ չեն ապրում` նման միջոցներ սպառազինության վրա ծախսելու համար: Այն պարագայում, եթե Հայաստանը շարունակի ներկա տեմպերով սպառազինվել, Ադրբեջանը հնարավորություն կունենա Հայաստանին կշտամբել չափից ավելի սպառազինվելու մեջ: Իսկ առայժմ դա դատարկ քարոզչություն է»,- նկատեց Ալեքսանդրովը:
Փորձագետը տարակուսանք հայտնեց Հուսեյնլիի այն մեղադրանքների առնչությամբ, թե հայ-ռուսական կապերը եւ ռազմավարական գործընեկերությունը տարածաշրջանում անհավասարակշռություն են ստեղծում: «Հայ-ռուսական հարաբերությունները, ընդհակառակը, պաշտպանում են ուժերի հավասարակշռությունը: Հարավային Կովկասում իր ներկայությամբ Ռուսաստանը հակակշիռ է Թուրքիային, Իրանին, խոչընդոտում է տարածաշրջան Արեւմուտքի ներթափանցմանը, ընդ որում` ռազմական ներթափանցամանը: Եթե չլիներ Ռուսաստանը, Հարավային Կովկասում նմանտիպ իրավիճակ կլիներ, ինչ Սիրիայում կամ Լիբիայում: Ո՞ւմ է պետք չդադարող պատերազմը»,- նկատեց զրուցակիցը` ավելացնելով, թե Ադրբեջանը պետք է ողջունի Ռուսաստանի ներկայությունը Հայաստանում:
«Բաքուն պետք է մտածի հրավիրել Ռուսաստանին` իր մոտ ռազմական կոնտինգենտ տեղակայելու: Դա կծառայի որպես տարածաշրջանում անվտանգության եւ կայունության երաշխիք»,-եզրափակեց Միխայիլ Ալեքսանդրովը:
