Ադրբեջանում Իրանի դեսպան Աբբաս Մուսավին պատասխանել է Շիրազում տեղի ունեցած ահաբեկչության հետ կապված Մեծ Բրիտանիայի դեսպանի թվիթին, որում նա Շահ-Չերագ դամբարանում տեղի ունեցած ահաբեկչությունն անվանել է բռնություն ժողովրդի նկատմամբ։

«Պարոն դեսպա՛ն, ահաբեկչությունը փոքրացնելը՝ այն անվանելով բռնություն կամ միջադեպ, գալիս է նրանից, որ դուք՝ արևմուտքցիներդ, ահաբեկչությունը բաժանում եք լավի և վատի: Լոնդոնում դանակահարությունն ահաբեկչություն անվանելով՝ դուք աչք եք փակում ահաբեկչության վրա։ Հիշեք նաև, որ եթե չլիներ մեր գեներալ Սոլեյմանիի խիզախությունը, դուք ստիպված կլինեիք ամեն օր դիակներ հավաքել Լոնդոնի փողոցներում»,- ասել է իրանցի դիվանագետը, հաղորդում է IRNA-ն:

Ավելի վաղ Թեհրանում Մեծ Բրիտանիայի դեսպան Սայմոն Շերկլիֆը ցավակցություն էր հայտնել զոհվածների ընտանիքներին՝ Շիրազում տեղի ունեցած «միջադեպի» կապակցությամբ։

Կիրակի երեկոյան ահաբեկիչը հրազենով ներխուժել է Շահ-Չերագի դամբարան ու մուտքի մոտ սկսել կրակել ուխտավորների ու սպասավորների վրա։ Հարձակման արդյունքում երկու մարդ զոհվել է, մի քանիսը վիրավորվել։