նախընտրելի դարձնելԱդրբեջանն ագրեսիա է իրականացնում, իսկ հետո անցնում դիվանագիտական դաշտում ակտիվության՝ ցույց տալու, որ եթե դիվանագիտական ճանապարհով չհասնի իր ուզածին, ապա նոր ագրեսիա կլինի։ Այս մասին NEWS.am -ի թղթակցի հետ զրույցում ասել է քաղաքական վերլուծաբան Արգիշտի Կիվիրյանը։
Ըստ նրա, Սոթքի ուղղությամբ ագրեսիան կարող է պայմանավորված լինել հանքի աշխատանքը խաթարելու և Հայաստանին տնտեսական վնաս պատճառելու ցանկությամբ։
«Սակայն ագրեսիան կարող է լինել ցանկացած այլ ուղղությամբ։ Այդպես կլինի այնքան ժամանակ, քանի դեռ չկարողանանք իրական պաշտպանություն կազմակերպել։ Հենց Բաքուն հասկանա, որ իր համար խաղաղությունն ավելի գերադասելի է, քան պատերազմը, կդադարեցնի սադրանքները»,- ասել է Կիվիրյանը։
Միևնույն ժամանակ հայկական կողմը կանգնած է վատի և վատթարի ընտրության առաջ, կարծում է նա։
«Հայկական կողմը պետք է ժամանակին ճիշտ հաշվարկեր խոշոր խաղացողների շահերը և չհայտնվեր ստեղծված իրավիճակում։ Շատերին թվում է, թե ընկնելու տեղ էլ չկա, բայց դա այդպես չէ։ Էլ ավելի դժվար ժամանակներ են սպասվում»,- ասել է վերլուծաբանը։
