նախընտրելի դարձնելՀայաստանն ու Ֆրանսիան կապված են բարձր մակարդակի առանձնաշնորհյալ հարաբերություններով: Այս մասին այսօր` հոկտեմբերի 13-ին, Երեւանում հայտարարել է Հայաստանի ԱԳ նախարար Էդվարդ Նալբանդյանը` Ֆրանսիայի Սենատի անդամ, Կլամարի քաղաքապետ, Իլ դե Ֆրանս շրջանային խորհրդի փոխնախագահ Ֆիլիպ Կալտենբախիի հետ հանդիպման ժամանակ:
ԱԳՆ մամուլի ծառայությունից NEWS.am-ին հայտնում են, որ Է. Նալբանդյանն ընդգծել է, որ հայ-ֆրանսիական բարձր մակարդակի հարաբերությունների վկայությունն է սեպտեմբերի վերջին նախագահ Սերժ Սարգսյանի պաշտոնական այցելությունը Ֆրանսիա եւ հոկտեմբերի սկզբին Ֆրանսիայի նախագահ Նիկոլա Սարկոզիի պետական այցելությունը Հայաստան:
Նալբանդյանը նշել է, որ այցելությունների ընթացքում ձեռք բերված պայմանավորվածությունները, արված շեշտադրումներն ու հայտարարությունները լավ հիմք են հանդիսանում երկկողմ բարեկամական հարաբերությունների առավել ամրապնդման եւ խորացման համար:
Ֆիլիպ Կալտենբախը, շնորհակալություն հայտնելով ընդունելության համար, ներկայացրել է իր գլխավորած պատվիրակության այցի նպատակները. Երեւանի հետ տնտեսական, մշակութային եւ զբոսաշրջության բնագավառներում համագործակցության ծավալումը, Կլամարի քույր քաղաք Արտաշատի հետ փոխգործակցության նոր համաձայնագրի ստորագրումն ու քաղաքի 2200-րդ ամյակին նվիրված տոնակատարություններին մասնակցությունը:
Հանդիպման ընթացքում զրուցակիցները քննարկել են Հայաստանի եւ Ֆրանսիայի միջեւ ապակենտրոնացված համագործակցության ընդլայնմանն առնչվող հարցերի լայն շրջանակ:
