ՆախընտրելիԵրեւանի «Մոսկվա» կինոթատրոնում բացվել է մանկապատանեկան միջազգային փառատոնը: Փառատոնը կազմակերպել է Ռոլան Բիկովի անվան մանկապատանեկան կինոյի եւ հեռուստատեսության զարգացման հայկական ֆոնդը: Փառատոնի բացման արարողությանը նախորդել է բեմականացված ներկայացում:
Փառատոնի մրցութային ծրագրում, որը կշարունակվի մինչեւ հոկտեմբերի 26-ը, կներկայացվեն մոտ 35 ֆիլմեր, գրեթե 100 պանորամային ֆիլմեր: Ավանդույթի համաձայն` «մեծահասակների» ժյուրիից բացի կլինի նաեւ մանկականը, որին մասնակցելու համար Վրաստանից երեխաներ կժամանեն Երեւան:
Փառատոնի շրջանակներում կիրագործվեն մի շարք նախաձեռնություններ, այդ թվում` սոցիալական: Երեւան կժամանի Յարոսլավլի շրջանի հիվանդանոցի Միկրոէնդոսկոպիկ օտորինոլարինգոլոգիայի կենտրոնի տնօրեն, ՌԴ վաստակավոր բժիշկ, բժշկական գիտությունների թեկնածու, պրոֆեսոր Վլադիմիր Կոզլովը, ով ծանր պաթոլոգիա ունեցող 4 երեխաների կվիրահատի: Վիրահատությունները կանցկացվեն «Արաբկիր» բժշկական կենտրոնում:
Հաջորդ նախաձեռնության շրջանակում երեքական երեխա Թուրքիայից, Վրաստանից եւ Հայաստանից փառատոնի 4 օրերի ընթացքում իրենց ֆիլմը կստեղծեն, որը կներկայացվի փառատոնի փակման ժամանակ: Մեկ այլ նախաձեռնություն` Երկրի օրը: Սա նոր նախաձեռնությունէ, եւ այդ օրերից առաջինը (թեմատիկան կփոխվի ամեն տարի) նվիրված է Ճապոնիային: Այդ նախաձեռնության շրջանակներում հոկտեմբերի 25-ին ցուցահանդես կբացվի, Ճապոնիայի մասին ֆիլմեր կցուցադրվեն, այդ թվում` Տոկիոյի մանկական փառատոնի մասին, որի պրոդյուսերը եւս փառատոնի հյուրերի շարքում կլինի:
Նույն օրը Ճապոնիայի օրվան նվիրված համերգ կկայանա, որի ընթացքում կհնչեն հայ եւ ճապոնացի երգահանների ստեղծագործություններ:
Փառատոնի շրջանակներում կանցկացվեն հայտնի բանաստեղծ եւ դրամատուրգ Յուրի Էնտինի եւ լատվիացի դերասան Իվար Կալնինիշի համերգները: Վերջինս հանդես կգա դստեր` 9-ամյա Լուիզայի հետ:
Փառատոնին ներկայացված ֆիլմերի դիտման համար երեւանյան դպրոցների սաներին բաժանվել է 15.000 տոմս:
