ՆախընտրելիԹուրքիայում տեղի ունեցած երկրաշարժի հետեւանքով, Հայկական ատոմակայանի հետ կապված ոչ մի վտանգ չկա, քանի որ երկրաշարժի էպիկենտրոնը Հայաստանից հեռու է ավելի քան 170 կմ: Այս մասին հայտարարել է Հայաստանի արտակարգ իրավիճակների նախարար Արմեն Երիցյանը:
ՀԱԷԿ-ի ղեկավար Գագիկ Մարկոսյանը նույնպես հայտարարել է, որ ատոմակայանում ստորերկրյա ցնցումները գրեթե չեն զգացել: Նրա խոսքով, Հայկական ատոմակայանի տեխնիկան ունակ է լուրջ պաշտպանություն ապահովել երկրաշարժի դեպքում: «Ռեակտորը եւ մնացած կարեւորագույն սարքավորումները վստահելիորեն պաշտպանված են հնարավոր երկրաշարժերի դեպքում: Հայաստանը խստորեն հետեւում է ԱԷՄԳ-ի կանոններին»,- ընդգծել է Մարկոսյանը:
Ի դեպ, նշենք, որ երկրաշարժից 5 ժամ անց, դեռ ստորերկրյա ցնցումներն էպիկենտրոնում շարունակվում են: Գրանցվել է մոտ 55 հետցնցում, բայց բոլորն էլ ավելի թույլ են եղել, քան գլխավոր ցնցումը, մինչեւ 5-8 բալ ուժգնության (հիմնական ցնցումը եղել է 9-10 բալ):
Ինչպես ավելի վաղ տեղեկացրել էր NEWS.am-ը, այսօր` հոկտեմբերի 23 -ին Թուրքիայում 7,1 մագնիտուդով հզոր երկրաշարժ է տեղի ունեցել: Էպիկենտրոնը գտնվել է Վանից 38 կմ հյուսիս-արեւելք: Ստորերկրյա ցնցումների ուժգնությունը կազմել է 9-10 բալ: Հիպոկենտրոնը գտնվել է 10 կմ խորության վրա: Ցնցումներն առաջացրել են ավերածություններ, էկեկտրաէներգիայի եւ բջջային կապի խափանումներ: Հայտնի է, որ Վանի կենտրոնում յոթհարկանի շենք է փլուզվել, փլատակների տակ մարդիկ կան, տեղում աշխատում են փրկարարները: Բացի Վանից, բավականին տուժել են նաեւ Կարսը, Արդահանը եւ Էրզրումը:
Հայաստանի տարածքում երկրաշարժն զգացվել է 3-5 բալ ուժգնությամբ` ժամը 15:45-ին:
Աղետի գոտում զոհերի թիվը կարող է հասնել 1000-ի, հազարավոր մարդիկ տուժել են: Վնասվել է Վանի օդանավակայանը եւ փրկարարները չեն կարողանում հասնել աղետի գոտի: Ստորերկրյա ցնցումների հետեւանքով փլվել է 50 բնակելի շենք, այդ թվում բազմահարկեր:
Երկրաշարժն ուժեղ զգացվել է նաեւ Հայաստանում, այդ թվում` Երեւանում: Մայրաքաղաքի տարբեր շրաջաններում բնակիչները դուրս են եկել շենքերից, հավաքվել բակերում: Կան տեղեկություններ, որ ստորերկրյա ցնցումներն ավելի ուժեղ են զգացվել Արարատյան դաշտավայրի բնակավայրերում: ԱԻՆ Սեյսմիկ պաշտպանության ազգային ծառայությունը դեռեւս տեղեկատվություն չի տարածել երկրաշարժի ուժգնության մասին:Ցնցումներից հետո բջջային կապը գործում է նկատելի խափանումներով:
