նախընտրելի դարձնելՀայաստանի արտգործնախարար Էդվարդ Նալբանդյանը հոկտեմբերի 29-ին Փարիզում մասնակցել է ՅՈՒՆԵՍԿՕ-ի 36-րդ գլխավոր կոնֆերանսին, որը նվիրված է առաջիկա երկու տարիներին կազմակերպության կողմից իրականացվելիք գործունեության հիմնական ուղղությունների քննարկմանը:
Ինչպես NEWS.am-ին հայտնեցին ԱԳՆ մամուլի ծառայությունից, համաժողովին Էդվարդ Նալբանդյանը հանդես է եկել ելույթով, որում անդրադարձել է Հայաստան-ՅՈՒՆԵՍԿՕ փոխգործակցությանը, մշակութային ժառանգության պահպանման գործում ՅՈՒՆԵՍԿՕ-ի դերակատարությանը:
Նախարար Նալբանդյանը դատապարտել է Ադրբեջանի կողմից պետական մակարդակով` ՅՈՒՆԵՍԿՕ-ի սկզբունքներին հակառակ, հայկական մշակութային ժառանգության ոչնչացման քաղաքականությունը եւ կոչ է արել միջազգային հանրությանը համատեղ քայլեր ձեռնարկել նման գործողությունները կանխարգելելու համար:
Նույն օրը նախարար Նալբանդյանը հանդիպում է ունեցել ՅՈՒՆԵՍԿՕ-ի գլխավոր տնօրեն Իրինա Բոկովայի հետ: Հայաստանի արտգործնախարարը գոհունակություն է հայտնել ՅՈՒՆԵՍԿՕ-ի մասնակցությամբ Հայաստանում իրականացվող ծրագրերի եւ միջոցառումների կապակցությամբ եւ պատրաստակամություն հայտնել շարունակել արդյունավետ համագործակցությունը կազմակերպության հետ:
Էդվարդ Նալբանդյանը ՅՈՒՆԵՍԿՕ-ի գլխավոր տնօրենին տեղեկացրել է հաջորդ տարի նշվելիք Հայկական գրահրատարակչության 500-ամյա տարեդարձի եւ Երեւանը որպես գրքի համաշխարհային մայրաքաղաք հռչակման շրջանակներում նախատեսվող միջոցառումների մասին եւ Իրինա Բոկովային հրավիրել այցելել Հայաստան:
