նախընտրելի դարձնելՀայաստանում Ֆիլիպ Կոտլերին հնարավոր կլինի տեսնել գրեթե բոլոր ձեւաչափերով` հեռուստահարցազրույցներ, երեկոյան ընդունելություններ, սեմինարներ: Հատկապես, երբ ժամանում է գիտելիքներով կիսվելու պատրաստ մասնագետ, գլխավորն այն է, որ նրան ավելի շատ տեսնեն եւ ավելի լավ լսեն: Նման կարծիք է հայտնում Philip Kotler in Armenia – 11.11.11 նախագծի ղեկավար Արմեն Սարգսյանը NEWS.am-ի հետ հարցազրույցում ` ներկայացնելով աշխարհահռչակ մարքետինգային խորհրդատուի այցի հիմնական ծրագիրը: Այցը հիմքեր կստեղծի տարածաշրջանային ուսումնական կենտրոնի բացման գործընկերության համար:
Հայաստանում Կոտլերը լինելու է գրեթե չորս օր: Ինչպե՞ս է հագեցված նման երկարատեւ ծրագիրը:
Հայաստանում նա լինելու է նոյեմբերի 13 -16-ը: Ժամանման իսկ օրը պաշտոնական ընդունելություն կլինի, ինչպես նաեւ ուղիղ կհեռարձակվի նրա հեռուստահարցազրույցը: Այցն իսկապես ուշադրության է արժանի նաեւ լայն հասարակայնության կողմից: Հազիվ թե Հայաստանում գտնվի մարքետինգի մասնագետ կամ ուսանող, որը չի կարդացել նրա գրքերից թեկուզ մեկը:
Մենք հասցրել ենք հանդիպումներ անցկացնել մոտ 700 ձեռնարկություններում, ներկայացնել նրանց այցի ծրագիրը: Ձեռներեցների եւ ուսանողների հետ մեր ճանաչողական հանդիպումները ցույց տվեցին, որ Կոտլերին գիտեն շատ ավելի լավ, քան կարծում էինք: Օրինակ, խանութներից մեկում մի վաճառողուհի պատմում էր ընկերուհիներին, թե շուտով Հայաստան է գալու Կոտլերը: «Իսկ ո՞վ Կետլերը» հարցին նա ոգեւորված պատասխանեց. «Ինչպե՞ս: Ֆիլիպ Կոտլերը, նա...»: Նման հետաքրքրությունը մեզ ուրախացնում է:
Այցի նշանակությունը նաեւ նրանում է, որ Հայաստան կգան մարքետինգային մասնագետներ ինչպես հարեւան երկրներից` Վրաստանից, Իրանից, այնպես էլ Եվրոպայից: Դա ուրախալի է. նշանակում է, մենք կարող ենք նաեւ նրանց հետ կապեր հաստատել:
Սակայն հեռուստադիտողին Կոտլերը, ամենայն հավանականությամբ, մարքետինգային սխեմաների մանրամասներին չի ծանոթացնի:
Հեռուստատեսությամբ նա կներկայացնի իր ընդհանրական գաղափարները:Իսկ հետո նոյեմբերի 14 – 15-ին արդեն թրեյնինգներ կանցկացնի: Մենեջերների համար ֆորումը բավականին խորացված կլինի եւ կետեւի 4 – 5 ժամ: Կլինի նաեւ ֆորում գործադիր տնօրենների համար (CEO Forum): Գործարարները հնարավորություն կունենան ուղղակի շփվել Կոտլերի հետ: Այդտեղ մենք սպասում ենք նաեւ օտարերկրյա դիվանագետների, կառավարության անդամների: Առանձին հանդիպումներ ենք նախատեսում նախագահի, վարչապետի հետ, իսկ CEO ֆորումի ժամանակ` նախարարների հետ:
Ե՞րբ Կոտլերը կհանդիպի ուսանողների հետ: Եւ նրանցից ով կարող է այդ սեմինարներին մասնակցել:
Մենք այս ծրագիրն անցկացնում ենք որպես հետագա ծրագրերի համար հիմք: Ապագայում Կոտլերը մտադիր է Հայաստնում ստեղծել տարածաշրջանային մարքետինգային կենտրոն: Ուստի մեզ համար կարեւոր է, որ ուսանողներն արդեն հիմա ծանոթանան նրա գաղափարներին: Մասնակցությունը ուսանողների համար մենք փորձեցինք հնարավորինս մատչելի դարձնել: Ամեն դեպքում, աշխատում ենք, որ ցանկացողներն ու ունակ ուսնողները կորողանան մասնակցել այդ հանդիպմանը, այդ իսկ պատճառով մենք հայտարարեցինք մարքետինգային հրոդվածի մրցույթ, որի հաղթողները կարող են սեմինարին մասնակցել անվճար:
Որքա՞ն է սեմինարներին մասնակցելու համար ուսանողների եւ գործարարների համար նախատեսված վճարը:
Ուսանողական ֆորումի համար այն պետք է կազմեր 45 հազ. դրամ, սակայն Gallup International ընկերության հովանավորությամբ այդ գումարը հնարավոր եղավ նվազեցնել 25 հազարի: Ցանկացողները կարող են նաեւ մասնացել Knowledge Forum սեմինարին, որի վարձավճարը 180 հազ. դրամ է: Ընդհանուր առմամբ, սա հավասար է Կետլերի թրեյնինգների նվազագույն գներին: CEO-ի եւ մասնագետների համար նախատեսված սեմինարի վարձավճարը 380-480 հազ. դրամ է: Շատերը տարակուսում են: Սակայն առաջին անգամ է Հայաստան այցելում նման հեղինակության եւ մասշտաբի մասնագետ, որի դասընթացը հնարավորություն կտա ունկնդրելու եւ վկայագիր ստանալու: Այդ վկայագիրը հաստատ վերջին ակտիվը չի լինի պրոֆեսիոնալի պորտֆելում:
Եւ ի՞նչ կարող է դա տալ:
Բնականաբար, Կոտլերի այցը միայն սեմինարներով չի սահմանափակվելու: Պրոֆեսորը շահագրգռված է ավելի լավ ծանոթանալ Հայաստանին: Պարզվում է, դեռ մինչեւ այցը նա բավականին լավ պատկերացում է ունեցել Հայաստանի մասին, մասնավորապես իր հայազգի ուսանողների հետ ունեցած շփումներից:
Սփյուռքի հայերի՞:
Նրանց շարքում շատ են եղել նաեւ հայաստանցի հայերը: Կատլերն, ամենայն հավանականությամբ, նրանց հետ շփումներում պոտենցիալ է նկատել:
Որքանով հասկանում եմ, նման ճանապարհորդություններ նա կատարում է ելնելով իր առաքելությունից, այն է` փոխանցել մարքետինգային գիտելիքներ, օգնել ներուժ ունեցող երկրներին, օգտագործել այդ գիտելիքները եւ հասնել հաջողության տարածաշրջանում: Բավական է միայն նշել, որ Թուրքիան ու Վրաստանը բավական երկար ժամանակ էին Կոտլերի հետ բանակցում, իսկ Ադրբեջանը, տեղեկանալով, որ նա այցելելու է Հայաստան, մի քանի անգամ փորձել է այդ շրջանակում այց առաջարկել նաեւ Ադրբեջան:
Կոտլերը կգնա, սակայն գիտելիքները կմնան: Ինչպե՞ս պետք է հետո տնօրինել դրանք:
Պրոֆեսորին հաջողություն մաղթելուց հետո մենք ձեռնամուխ կլինենք մարքետինգի տարածաշրջանային կենտրոնի բացմանը` Կոտլերի եւ Kotler Impact-ի գործընկերությամբ: Կենտրոնը կդառնա հետբուհական ձեւաչափի ուսումնական հաստատություն `մարքենտինգի եւ մենջմենթի ուղղվածությամբ, 1,5 – 2 տարի ուսումնառության ժամկետով: Այնտեղ կարող են սովորել նաեւ Վրաստանի, Ադրբեջանի մասնագետները, հետաքրքրվածություն է նկատվում նաեւ ԱՊՀ երկրներից:
Կենտրոնը կդիտարկի նաեւ հեռահար ուսուցման հնարավորությունը: Մենք կապեր կհաստատենք տարբեր երկրներում նմանատիպ կենտրոնների հետ: Դասախոսների մեծ մասն էլ կհրավիրվեն արտերկրից: Ուրախությամբ պետք է նշեմ, որ նման կենտրոնում դասավանդման մակարդակին բավարարում են նաեւ մեր որոշ մասնագետներ:
Մենք ակնկալում ենք արդյունքներ երկարաժամկետ հեռանկարում. երբ այս այցի ազդեցության շնորհիվ, կենտրոնում ուսուցումներից հետո կամ իրենց վրա աշխատանքի արդյունքում կբարձրանա մեր մասնագետների ընդհանուր մակարդակը, նրանց ճանաչելիությունը արտերկրում: Դրանից չի կարող չշահել մեզնից յուրաքանչյուրը:
