նախընտրելի դարձնելՀայաստանի կրթության եւ գիտության նախարար Արմեն Աշոտյանն այսօր ընդունել է Հայաստանում ԱՄՆ նորանշանակ դեսպան Ջոն Հեֆերնին եւ նրա հետ քննարկել Հայաստանում ամերիկյան հետազոտությունների կենտրոն հիմնելու հարցը:
ԿԳՆ մամուլի ծառայությունից NEWS.am-ին հայտնում են, որ նախարարը շնորհավորել է դեսպանին պաշտոնն ստանձնելու կապակցությամբ եւ մաղթել արդյունավետ աշխատանք:
Նախարարը բարձր է գնահատել հայ- ամերիկյան համագործակցությունը կրթության ոլորտում եւ շեշտել, որ մեր երկրում իրականացվող ամերիկյան կրթական ծրագրերը նպատակային են եւ թույլ են տալիս բավարարել յուրաքանչյուրի կրթական առանձնահատկությունն ու պահանջը: Դեսպանը, շնորհակալություն հայտնելով նախարարին ընդունելության համար, կարեւորել եւ պատրաստակամություն է հայտնել նպաստելու համատեղ կրթական ծրագրերի շարունակականության ապահովմանը: Հանդիպման ընթացքում արդյունավետ քննարկում է ծավալվել Հայաստանում ամերիկյան հետազոտությունների կենտրոն հիմնելու հարցի շուրջ:
Ընդգծելով, որ կրթությունը Հայաստանի Հանրապետության կառավարության գերակա ուղղություններից է, նախարար Արմեն Աշոտյանը կարեւորել է տարածաշրջանի բարձրագույն ուսումնական հաստատությունների վարկանշավորման գործընթացի անհրաժեշտությունը եւ հույս հայտնել, որ ամերիկյան կողմը կաջակցի այս նախաձեռնությանը: Հանդիպման ավարտին կողմերը պատրաստակամություն են արտահայտել ընթացքի մեջ գտնվող ծրագրերը շարունակելու եւ նոր նախաձեռնություններով հանդես գալու վերաբերյալ:
