ՆախընտրելիՀայաստանի փոխվարչապետ, տարածքային կառավարման նախարար Արմեն Գեւորգյանը Լեհաստանի Պոզնան քաղաքում այսօր մասնակցել է Պրահյան գործընթացի «Միգրացիոն գործընկերության կառուցում» նախարարական երկրորդ համաժողովին:
Նշենք, որ Պրահյան գործընթացի անդամ են Եվրամիության, Հարավարեւելյան եւ Արեւելյան Եվրոպայի, Կենտրոնական Ասիայի երկրները: Գործընթացը մեկնարկել է 2009թ. Պրահայում եւ ուղղված է անդամ-պետությունների միջեւ միգրացիոն ոլորտում գործընկերության խորացմանը:
Համաժողովի լիագումար նիստերում քննարկվել է երեք հիմնական թեմա` «Անօրինական միգրացիայի դեմ պայքարն ու նախազգուշացումը», «Օրինական միգրացիան եւ շարժունակությունը` աշխատանքային միգրացիայի շեշտադրմամբ» եւ «Միգրացիան ու շարժունակությունը որպես զարգացման դրական ուժ»:
ՀՀ փոխվարչապետ Ա. Գեւորգյանը Շվեդիայի միգրացիայի եւ ապաստանի քաղաքականության նախարար Թ. Բիլսթրոմի հետ վարել է համաժողովի լիագումար նիստի «Ապաստանի տրամադրման եւ միջազգային պաշտպանության ոլորտում ներուժի ամրապնդումը» թեմայով քննարկումը, որի ժամանակ հանդես է եկել նաեւ ելույթով:
Նա մասնավորապես կարեւորել է Պրահյան գործընթացի մասնակից-երկրների հետ միգրացիոն ոլորտում համագործակցության խորացումը, առկա խնդրների համատեղ քննարկումը եւ դրանց կարգավորմանն ուղղված համաձայնեցված որոշումների մշակումը: Փոխվարչապետն անդրադարձել է ապաստանի եւ միջազգային պաշտպանության համակարգում իրականացված քայլերին: «Չնայած ձեռքբերումներին` ապաստանի եւ պաշտպանության համակարգի կատարելագործման հարցերը մնում են մեր օրակարգում: Այսօր մենք կանգնած ենք ապաստանի ազգային համակարգը ԵՄ-ում ընդունված չափանիշներին ներդաշնակեցնելու անհրաժեշտության առջեւ»,-նշել է փոխվարչապետը:
Համաժողովի արդյունքներով հավանության է արժանացել Պրահյան գործընթացի 2012-2016թթ. գործողության ծրագիրը:
