ՆախընտրելիՄահմեդական գլխավոր տոնի` Կուրբան Բայրամի կապակցությամբ Սիրիայի իշխանություններն ազատ են արձակել 553 մարդու, որոնք ձերբակալվել էին անկարգություններին մասնակցելու համար, հաղորդում է Սանա գործակալությունը: Ավելի վաղ ազատ էր արձակվել եւս 119 մարդ:
Միաժամանակ, Reuters գործակալությունը հաղորդում է, որ Սիրիայում ցուցարարների հետ բախումների արդյունքում նորից զոհեր կան. առնվազն չորս մարդ է զոհվել: Ինչպես փոխանցել է ակտիվիստներից մեկը, ինքնաբուխ ցույցն առաջացել է մզկիթներում տոնական աղոթքից հետո:
Նոյեմբերի 5 –ին բախումների արդյուքնում հաղորդվում էր առնվազն 20 զոհի մասին:
Հիշեցնենք, որ նոյեմբերի 4 –ին Սիրիայի իշխանությունները զինված խմբավորումներին համաներում էին խոստացել` զինված դիմադրությունից հրաժարվելու եւ զենքը հանձնելու դիմաց: Իշխանությունների առաջարկն ուժի մեջ է մեկ շաբաթվա ընթացքում:
Ավելի վաղ Սիրիան համաձայնել էր Արաբական պետությունների լիգայի` իրավիճակը կարգավորելու մասին առաջարկություններին: Համաձայն ընդունված «ճանապարհային քարտեզի», իշխանությունները պետք է անհապաղ դուրս բերեն զորքերը քաղաքից եւ դադարեցնեն զինված գործողությունները:
