Նախընտրելի«Զվարթնոց» օդանավակայանը ավիափոխադրման սակագները չի թանկացրել: Այս մասին նոյեմբերի 7-ին կայացած մամլո ասուլիսում հայտարարեց «Արմենիա միջազգային օդանավակայաններ» ընկերության գլխավոր մենեջերի տեղակալ Անդրանիկ Շխյանը` մեկնաբանելով «Արմավիա» ավիաընկերության տարածած տեղեկատվությունը օդանավակայանում ծառայության գների բարձրացման վերաբերյալ:
«Արմավիա» ավիաընկերության հետ ձեռքբերած պայմանավորվածությունների վերաբերյալ Շխյանը նշեց, որ դա շատ բարդ գործընթաց է եւ շատ կողմերով պետք է համաձայնեցվի. «Չվերթների սպասարկման ժամանակացույցը կպահպանվի մինչեւ ընթացիկ շաբաթվա կեսը: Երկու կողմերի միջեւ տարաձայնությունները սովորական են առեւտրային հարաբերություններում: Ամեն դեպքում, «Արմավիան» դրականորեն է տրամադրված պարտքի մարման հարցում, որը երկու անգամ գերազանցում է սահմանված չափերը:
Ավելի վաղ NEWS.am-ը հայտնել էր, որ «Արմավիա» ավիաընկերության եւ «Արմենիա միջազգային օդանավակայաններ» ընկերության միջեւ բանակցությունները կշարունակվեն մինչեւ նոյեմբերի 8-ը: «Արմավիայի» մամուլի քարտուղար Նանա Ավետիսովայի խոսքով` մինչ այդ ավիաընկերության չվերթները կիրականացվեն առանց ուշացումների:
Հիշեցնենք, որ նոյեմբերի 3-ին Երեւան-Մոսկվա 512 երթուղին ուշացել էր, եւ, Ավետիսովայի խոսքով, պատճառը «Արմավիա» եւ «Արմենիա միջազգային օդանավակայաններ» ընկերությունների միջեւ տարաձայնություններն էին:
«Ձմռան շրջանում օդանավակայանը բարձրացրել է ծառայության սակագները: Այժմ բանակցություններ են տարվում. մենք համաձայն չենք նրանց սակագնային քաղաքականությանը, նրանք համաձայն չեն մեզ հետ: Մեր ղեկավարության խոսքով` օդանավակայանն արդեն կառուցվել է եւ կարելի է վերանայել սակագները»,- հայտնել է Ավետիսովան:
