նախընտրելի դարձնելԱմերիկացիների մեծ մասը Իրանի կամ Չինաստանի հետ պատերազմ չեն ցանկանում, թեեւ Չինաստանից ԱՄՆ-ի նկատմամբ սպառնալիք տեսնում են: Նրանք դեմ են նաեւ ԱՄՆ-ի կողմից ողջ աշխարհում ժողովրդավարության «ներդրմանը»: Այդպիսին են CBS հեռուստաընկերության հարցման արդյունքները:
Համաձայն հետազոտությունների արդյունքների` ամերիկացիների մեծ մասը (55 տոկոս) վստահ է, որ Իրանի կողմից սպառնալիքը հնարավոր է զսպել դիվանագիտական մեթոդներով: Հարցվածների 15 տոկոսը կողմ են Իրանի դեմ ռազմական գործողությունների սկսմանը, 17 տոկոս-ն ընդհանրապես Իրանից սպառնալիք չի տեսնում:
ԱՄՆ քաղաքացիները լրջորեն մտահոգված են Չինաստանի տնտեսական էքսպանսիայով եւ ռազմական հզորության աճով: Ամերիկացիների 61 տոկոսը դրանում բացասական հետեւանք է նկատում, իսկ 67 տոկոսը վստահ է, որ Պեկինն Ամերիկայի համար ռազմական սպառնալիք է ներկայացնում:
10 ամերիկացիներից 7-ը դեմ են բռնապետական ռեժիմները ժողովրդավարականի վերածելու ԱՄՆ-ի փորձերին, ամերիկացիների կեսն էլ կարծում է, որ ԱՄՆ-ն չպետք է մասնակցեր Լիբիայում ռազմական գործողություններին:
Հարցումը նաեւ ցույց է տվել, որ ամերիկացիների 42 տոկոսը պաշտպանում է Պաղեստինյան ինքնավարության անկախությունը, դեմ է 34 տոկոսը: Միաժամանակ ամերիկացիների միայն 25 տոկոսն է դրական տրամադրված իսլամի նկատմամբ, 32 տոկոսն այդ կրոնի նկատմամբ դրական վերաբերմունք չի դրսեւորում:
Հարցումն անցկացվել է ողջ երկրում` նոյեմբերի 6-10-ը, 1182 չափահաս բնակչության շրջանում:
