նախընտրելի դարձնելՀաշված ժամեր են մնացել Իտալիայի վարչապետ Սիլվիո Բեռլուսկոնիի հրաժարականին, եւ նրա պաշտոնի համար երեք հավանական թեկնածուների անուններ են շրջանառվում` տնտեսագետ, ԵՄ հակամենաշնորհային կոմիտեի նախկին ղեկավար Մարիո Մոնտի, իշխող «Ազատության ժողովուրդ» կուսակցության քարտուղար Անջելինո Ալֆանո եւ հայտնի քաղաքական գործիչ, նախկին վարչապետ Լամբերտո Դինի, որը կառավարությունը ղեկավարել է 1995-1996թթ.:
Առավել հավանական թեկնածու է համարվում Մարիո Մոնտին, ում նախագահ Ջորջո Նապոլիտանոն նոյեմբերի 9-ին ցմահ սենատոր է նշանակել: Նրան սատարում են ընդդիմադիր ուժերի ներկայացուցիչները, այդ թվում` «Արժեքների Իտալիա» կուսակցությունը, հայտնում է Ansa գործակալությունը:
Մոնտիին դեմ են Բեռլուսկոնիի շատ կուսակիցներ, ինչպես նաեւ «Հյուսիսի լիգա» կուսակցությունը, որն առավել հակված է աջակցել 80-ամյա Լամբերտո Դինիին, որը անցյալում Իտալիայի կառավարությունում կարեւոր պաշտոններ է զբաղեցրել:
Իշխող կոալիցիայի թեկնածուն Անջելինո Ալֆանոն է, ում Բեռլուսկոնին քանիցս անվանել է իր փոխարինող:
Հիշեցնենք, Պատգամավորների պալատը այսօր երկրի տնտեսական իրավիճակը կայունացնող օրենք է ընդունելու, որը, մասնավորապես, ներառում է ԵՄ ղեկավարության հետ համաձայնեցված հակաճգնաժամային միջոցառումներ: Օրենքն արդեն ստացել է Սենատի հավանությունը, եւ Ստորին պալատում դրա ընդունվելուց հետո Բեռլուսկոնին պետք է պաշտոնապես հայտարարի իր հրաժարականի մասին:
