Նորվեգիայի Գերագույն դատարանը որոշել է ահաբեկիչ Անդրես Բրեյվիկի գործի  դատական լսումները բաց ռեժիմով անցկացնել:  Մոտակա նիստը, որի ընթացքում կորոշվի Բրեյվիկի կալանքի ժամկետի երկարացման հարցը,  կկայանա նոյեմբերի 14-ին, հայտնում է  РБК-ն: Նախկինում սույն գործի լսումները փակ դռների ետեւում էին անցկացվում:

Գերագույն դատարանը նաեւ վճռել է, որ Բրեյվիկն անձամբ պետք է ներկա գտնվի  դատարանում եւ ցուցմունք տա, թեեւ առաջին ատյանի դատարանը որոշել էր,  որ մեղադրյալը պետք է ցուցմունք տա տեսակապով` իր բանտախցից:

Ինչպես ավելի վաղ հայտնել էր NEWS.am-ը, Նորվեգիայում հուլիսի 22-ին կրկնակի ահաբեկչություն էր իրականացվել: Սկզբում Օսլոյի կառավարական շենքի մոտ` վարչապետի գրասենյակի դիմաց,  պայթյուն էր որոտացել, իսկ մի քանի ժամ անց ոստիկանական համազգեստով տղամարդը Ութոյա կղզում` Նորվեգիայի մայրաքաղաքից ոչ հեռու, կրակոցներ էր արձակել իշխող Նորվեգական բանվորական կուսակցության երիտասարդական ճամբարի դեռահասների վրա:  Ողբերգության զոհ էր դարձել 77 մարդ:

Ահաբեկիչը 32-ամյա Անդրես Բերինգ Բրեյվիկն էր: Դատարանում նա հայտարարել էր, որ փորձել է փրկել Նորվեգիան: Ահաբեկչությունից առաջ Բրեյվիկը գրել եւ համացանցում հրապարակել էր  «2083. Եվրոպայի անկախության հռչակագիրը» մանիֆեստը:  Դրանում ահաբեկիչը քննադատում է բազմամշակութայնությունը եւ ոչ եվրոպացիներին Եվրոպայից վտարելու մանրամասն ծրագիր ներկայացնում: