նախընտրելի դարձնելԵԱՀԿ Մինսկի խմբի համանախագահների առաջիկա այցը Հարավային Կովկաս հերթական աշխատանքային այցն է: NEWS.am-ի թղթակցի հետ զրույցում ասաց Մոսկվայի պետհամալսարանի` հետխորհրդային տարածքում հասարակական-քաղաքական գործընթացների հետազոտության կենտրոնի քաղաքական կանխատեսման բաժնի ղեկավար Ալեքսանդր Կարավաեւը: Նրա կարծիքով` տվյալ պահին համանախագահները ղարաբաղյան հակամարտության կարգավորման առումով նոր բան չեն կարող առաջարկել: «Այդ այցից ես նորություններ չեմ սպասում: Չեմ կարծում, որ համանախագահները բերում են նոր, նախկինում չներկայացված առաջարկութուններ, որոնք կհետաքրքրեն կողմերին եւ կարգավորման գործընթացին նոր թափ կհաղորդեն»,- նշեց փորձագետը:
Կարավաեւի խոսքով` սա դիվանագիտական աշխատանքի համար անհրաժեշտ հերթական այց է: «ԵԱՀԿ Մինսկի խումբն աշխատում է որոշակի ժամանակացույցով, ունի իր գործունեության կանոնակարգը: Դրա փոփոխությունները կարող են պայմանավորված լինել ընդհանուր աշխարհաքաղաքական քարտեզի, մի շարք երկրների միջեւ երկկողմ հարաբերությունների փոփոխություններով, նոր սպառնալիքների ի հայտ գալով եւ այլն: Նոր թեմաների ի հայտ գալու դեպքում Մինսկի խումբը կարող է դրանք օգտագործել, սակայն առանց դրա, նրանցից նորարություններ ակնկալել պետք չէ»,-նկատեց Կարավաեւը:
