նախընտրելի դարձնելԻտալիայի արդեն նախկին վարչապետ Սիլվիո Բեռլուսկոնին ամենահայտնի եւ ամենասկանդալային ժամանակակից քաղաքական գործիչներից է: Հայտնի լինելով գեղեցիկ սեռի նկատմամբ իր հիպերակտիվությամբ` նա բազմիցս է ներքաշվել տարբեր աղմկոտ քրեական գործերի մեջ` մեղադրվելով կոռուպցիայի, մաֆիայի հետ ունեցած կապերի, պաշտոնական դիրքի չարաշահման եւ այլնի համար` այդպես էլ մնալով չմերկացված «մերկ թագավոր»: Ինչո՞ւմն է այսպիսով Cavaliere-ի գաղտնիքը:Բանկային ծառայողի որդի, կրթությամբ իրավաբան Սիլվիոն դեռ մանկությունից էր փող սիրում: Դպրոցում նա գումարի դիմաց կատարում էր համադասարանցիների տնային աշխատանքները:
25 տարեկանում գերազանցությամբ ավարտելով Միլանի համալսարանի իրավաբանական ֆակուլտետը, նա անմիջապես սկսում է զբաղվել բիզնեսով: Սկզբում բացում է շինարարական ընկերություն, հետո ձեռք բերում թերթ եւ 3 հեռուստաալիք` ստեղծելով հոլդինգ, իսկ 1986 թ-ին դառնում է «Միլան» ֆուտբոլային ակումբի սեփականատերը: 12 տարի անց նա դառնում է Իտալիայում ամենախոշոր «La Stando» հանրախանութների ցանցի սեփականատերը: Բացի այդ, նրա «կայսրության» մեջ էին մտնում ապահովագրական ընկերություներ, խանութներ, ներդրումային հիմնադրամներ եւ այլն:Բեռլուսկոնին 1994թ-ին հիմնադրում է «Առաջ, Իտալիա» կուսակցությունը, որը բոլորի, ու, հատկապես, իտալացիների համար անսպասելիորեն հաղթում է խորհրդարանական ընտրություններում: Բեռլուսկոնին էլ դառնում է վարչապետ:Այդ պահից ի վեր Բեռլուսկոնին բազմիցս մեղադրվել է ֆինանսական մեքենայությունների, կոռուպցիայի, սեքսուլ սկանդալների մասնակցության մեջ եւ կանգնել դատարանի առջեւ:
Քրեական գործերի մի մասն ավարտվել են նրա նկատմամբ ազատազրկման դատավճռով, սակայն ամեն անգամ Գերագույն դատարանը չեղյալ է համարել ստորին ատյանի դատարանների դատավճիռները, եւ հաջողակ քաղաքական գործիչն այդպես էլ երբեք չի նստել:Վերջին 3 տարվա ընթացքում ամուսնական անհավատարմության մեջ մերկացված վարչապետը հասցրեց ամուսնալուծվել, ինչպես նաեւ հարձակման եթարկվել հոգեպես անհավասարակշիռ իտալացու կողմից` կարցնելով մի քանի ատամ եւ ստանալով քթի կոտրվածք:Իտալական լրատվամիջոցները հաճախ էին գրում վարչապետի սեքսուալ արկածների եւ այն երեկոների մասին, որը նա կազմակերպում էր Միլանի մոտ գտնվող իր վիլլայում` թեթեւաբարո կանանց եւ անգամ անչափահասների հետ:
Սակայն վարչապետին միշտ էլ հաջողվում էր ջրից չոր դուրս գալ:Նույնիսկ այս ամենից հետո, այսօր` նոյեմբերի 13-ին, Բեռլուսկոնին նամակ է ուղարկել «La Destra» քաղաքական շարժման առաջնորդ Ֆրանչեսկո Ստորաչեին, որում հայտարարում է, թե հպարտ է իր կառավարության աշխատանքով եւ ապագայում մտադիր է վերադառնալ գործադիր իշխանություն:Կյանքը ցույց է տալիս, որ նա միշտ հասնում է իր նպատակին: Հնարավոր է, որ Իտալիայի նախկին վարչապետն իրեն դեռ նորից կկարողանա դրսեւորել:
