նախընտրելի դարձնելՀայ-ադրբեջանական սահմանի սահմանազատումը կիրականացվի նույն քարտեզներով։ Հիմք է վերցվել Ալմաթիի հռչակագիրը։ Այս մասին NEWS.am-ի թղթակցի հետ զրույցում ասել է կառավարող «Քաղաքացիական պայմանագիր» խմբակցության պատգամավոր Գագիկ Մելքոնյանը։
«Մենք գործ ունենք ագրեսոր երկրի հետ, եւ բոլորս պետք է պատրաստ լինենք, մենք ԱԳՆ մակարդակով նախազգուշացրել ենք բոլորին այն մասին, թե ինչ կարող է տեղի ունենալ»,- նշել է նա։
Պատգամավորը նշել է, որ Հայաստանն առայժմ պատասխան չի ստացել Բաքվից խաղաղության համաձայնագրի վերջին առաջարկների մասին։
Մելքոնյանը հավաստիացրել է, որ Հայաստանի իշխանությունները չեն դիմել եւ չեն դիմի միակողմանի զիջումների Ադրբեջանին։
«Մենք վերադարձրել ենք նրանց իրենց տարածքները Ալմաթիի հռչակագրով»,- ընդգծել է նա։
Խորհրդարանականը ենթադրել է, որ ադրբեջանցիները չեն հրաժարվի հետագա սահմանազատումից, քանի որ Եվրոպան սկսում է իրենց մեղադրել այն բանում, որ չեն կատարում իրենց պարտավորությունները։
«Որքան խաղաղություն մեզ է պետք, նույնքան էլ պետք է իրենց։ Արդբեջանին նույնպես խաղաղություն է պետք, այնպես չէ, որ իրենց ժողովուրդը պատրաստ է պատերազմի։ Պարզապես Ադրբեջանի իշխանությունները փորձում են օգտվել պահից եւ թելադրել իրենց պայմանները, բայց դա չի ստացվի»,- ասել է Մելքոնյանը։
Նա հավաստիացրել է, որ «Հանուն հայրենիքի» շարժումը սպառնալիք չէր Հայաստանի իշխանությունների համար՝ շարժումն անվանելով հինգերորդ շարասյուն, որը «չի թողնում հանգիստ ու խաղաղ ապրել»։
«Մենք ձգտում ենք խաղաղության, բայց պատերազմից չենք վախենում»,- ամփոփել է պատգամավորը։
