ԱՄՆ-ում «սեւ ուրբաթը»` տարվա գլխավոր զեղչերի սեզոնն ուղեկցվել է մի շարք տհաճ միջադեպերով:  Երկրի միլիոնավոր բնակիչներ եւ զբոսաշրջիկներ, ովքեր կեսգիշերին գրոհել են խանութները, պատրաստ են եղել անել ամեն ինչ` ամենամեծ զեղչերով ապրանքը ձեռք բերելու համար:

Ոստիկանությունը  միջամտելու վերաբերյալ առաջին լուրջ առիթն ունեցել է Լոս Անջելեսում` հինգշաբթի երեկոյան,  երբ « Ուոլլմարտ»  հանրախանութի հերթում մի կին, իր «մրացակիցներից» առաջ անցնելու համար,  20 գնորդների աչքերին ուղղակի  պղպեղ է  շաղ տվել: Նյու Յորքում նույն ցանցի խանութներից մեկում վիճաբանություն է ծագել  ոսկերչական  բաժնի դրամարկղի մոտ. արդյունքում վնասվածք է ստացել երկու կին եւ մեկ տղամարդ:

Հյուսիսային Կարոլինայում էլ  երկու մարդ հրազեն են կիրառել` խանութներում իրենց ճանապարհը բացելու համար:

ԱՄՆ մանրածախ առեւտրի ազգային ֆեդերացիան վաստահ է, որ ոչինչ չի խանգարում հասնել նոր պատմական ռեկորդի: Փորձագետների կանխատեսումներով` «սեւ ուրբաթից» սկսած` երեք օրվա ընթացքում, ամերիկյան հանրախանութներ կայցելի 152 մլն մարդ,  ինչը 1%-ով կգերազանցի անցյալ տարվա ցուցանիշը: