ՆախընտրելիԴնեպրի հատակից գտնված 10-րդ դարի բացառիկ թուրը ցուցադրվել է Զապորոժիեի «Խորտիցա» արգելոցում: Հնագույն վարպետների պատրաստած մեկ մետր երկարությամբ եւ մոտավորապես մեկ կիլոգրամ կշռող թուրը Դնեպրի հատակից հայտնաբերել է զապորոժիեցի ձկնորսը:
Ուկրաինայի գիտահետազոտական ռեստավրացիոն կենտրոնի աշխատակիցը, ներկայացնելով թուրը, նշել է, որ այն գերթե չի տուժել: Նրա դաստակալի ձեւը թույլ է տալիս այն վերագրել նախաքրիստոնեական շրջանին`մոտավորապես 10-րդ դարի կեսերին:
Մասնագետների խոսքով` տիրոջ բարձր խավին պատկանելու մասին է վկայում այն, որ այդ դարաշրջանի համար կիրառվել է թրի պատրաստման բավականին բարդ տեխնոլոգիա` մի քանի գունավոր մետաղների համադրությամբ` պղինձ, արծաթ եւ դեղին մետաղ, որը կարող է լինել ցածր հարգի ոսկի կամ արույր:
ԻՏԱՌ-ՏԱՍՍ-ը նշում է, որ ուկրաինական լրատվամիջոցները այն համարում են Սվյատոսլավ Իգորեւիչ իշխանի թուրը, եւ այդ վարկածը, ըստ մասնագետների, ունի կյանքի իրավունք:
Համաձայն տարեգրության` Սվյատոսլավ իշխանը զոհվել է թշնամու դեմ մարտում` Դնեպրի մատույցներում գետն անցնելու ժամանակ: Պնդել, որ այն իսկապես պատկանել է իշխանի ուղեկիցներին, թե անձամբ նրան, հնարավոր կլինի ասել միայն մի շարք փորձաքննություններից հետո:
Գիտնականները հուսով են, որ որոշ գաղտնիքներ կբացվեն ռեստավրացիայի ժամանակ, որը կարժենա 3 հազար դոլար: Սակայն արդեն հիմա պատմաբաններն ու հնագետները նշում են գտածոյի պատմական բարձր արժեքը:
