նախընտրելի դարձնել
Պաղեստինյան արմատական ՀԱՄԱՍ շարժման քաղբյուրոյի ղեկավար Իսմայիլ Հանիեի սպանությունը չէր կարող իրականացվել առանց ԱՄՆ հետախուզության աջակցության։ Դրա մասին ՄԱԿ-ի Անվտանգության խորհրդի արտակարգ նիստում հայտարարել է համաշխարհային կազմակերպությունում Իրանի մշտական ներկայացուցիչ Ամիր Սաիդ Իրավանին։
«Այս զազրելի հանցագործության մեջ չի կարելի անտեսել Միացյալ Նահանգների պատասխանատվությունը՝ որպես տարածաշրջանում իսրայելական ռեժիմի ռազմավարական դաշնակցի և հիմնական աջակցի: Այս գործողությունը չէր կարող իրականացվել առանց [Վաշինգտոնի] թույլտվության և ԱՄՆ հետախուզական համայնքի աջակցության»,- ընդգծել է Իրավանին։
«Անվտանգության խորհուրդը պետք է անհապաղ քայլեր ձեռնարկի Իսրայելին այս արարքի համար պատասխանատվության ենթարկելու համար: Հուսով ենք, որ դա կարվի պատժամիջոցների և այլ անհրաժեշտ միջոցների ներդրմամբ»,- ընդգծել է Ամիր Սաիդ Իրավանին։ «Այս ռեժիմին չի կարելի թույլ տալ խուսափել պատասխանատվությունից և իր կատարած խախտումների հետևանքներից»,- հավելել է դիվանագետը։
Նա միաժամանակ հայտարարել է, որ Ռուսաստանը ՄԱԿ-ի Անվտանգության խորհրդին Թեհրանում ՀԱՄԱՍ-ի քաղբյուրոյի ղեկավարի սպանությունը դատապարտող մամուլի հայտարարություն է առաջարկել, սակայն փաստաթղթի ընդունումն արգելափակել են Մեծ Բրիտանիան, ԱՄՆ-ն ու Ֆրանսիան։
