նախընտրելի դարձնել
Իրանի նոր նախագահ Մասուդ Պեզեշքիանը Ֆրանսիայի նախագահ Էմանուել Մակրոնի հետ զրույցում հայտարարել է, որ Միացյալ Նահանգները և արևմտյան երկրները պետք է անհապաղ դադարեցնեն զենք մատակարարել Իսրայելի ռեժիմին, եթե ձգտում են խաղաղության և անվտանգության, գրում է իրանական Mehr գործակալությունը։
Մասուդ Պեզեշքիանին չորեքշաբթի զանգահարել է Ֆրանսիայի նախագահը՝ մտահոգություն հայտնելով ՀԱՄԱՍ-ի քաղաքական առաջնորդ Իսմայիլ Հանիեի սպանությունից հետո տարածաշրջանում իրավիճակի սրման մասին և զսպվածության կոչ արեց Իրանին։
Պեզեշքիանն իր հերթին ընդգծել է, որ Հանիեի սպանությունը, որն Իրանում էր պաշտոնական հյուրի կարգավիճակով, Իսրայելի կողմից «տարածաշրջանում պատերազմի կրակն ավելի բորբոքելու փորձ էր»:
«Իրանի Իսլամական Հանրապետությունն իր հիմնարար սկզբունքներն է համարում պատերազմի կանխումը և համաշխարհային խաղաղության և անվտանգության հաստատմանն ուղղված ջանքերը։ Սակայն միջազգային պայմանագրերի և օրենքների շրջանակում այն երբեք չի լռի իր շահերի և անվտանգության ոտնահարման դեմ հանդիման»,- ասել է Իրանի նախագահը Մակրոնին։
Նա ընդգծել է, որ ԱՄՆ-ը և արևմտյան երկրներն աջակցել են Իսրայելին՝ վերջինիս գործողությունները դատապարտելու փոխարեն։
Պեզեշքիանն ընդգծել է, որ Իրանը մշտապես վճռորոշ դեր է խաղացել տարածաշրջանում և ամբողջ աշխարհում խաղաղության, կայունության և անվտանգության ապահովման գործում՝ ընդգծելով, որ Իրանը իրեն իրավունք է վերապահում համաչափ պատասխան տալ Իսրայելի ագրեսիայի ակտին։
«Միացյալ Նահանգները և արևմտյան երկրներն աջակցում են մի ռեժիմի, որը չի ենթարկվում միջազգային օրենքներին և կանոնակարգերից որևէ մեկին և տարածաշրջանում որևէ հանցավոր գործողություններից ձեռնպահ չի մնում՝ հավատարիմ մնալով իրարամերժ և երկիմաստ մոտեցմանը»,- ասել է նա։ Իրանի նախագահը հավելել է, որ արևմտյան երկրները ահաբեկչական գործողությունների թիրախ դարձած երկրներին կոչ են անում զերծ մնալ պատասխան գործողություններից և զսպվածություն ցուցաբերել։
Պեզեշքիանն ընդգծել է, որ եթե ԱՄՆ-ն ու արևմտյան երկրները ցանկանում են կանխել պատերազմն ու անվտանգության բացակայությունը տարածաշրջանում, պետք է անհապաղ դադարեցնեն զենք վաճառելն ու աջակցել Իսրայելին և ստիպեն նրան դադարեցնել հարձակումները Գազայի վրա և համաձայնել հրադադարի։
Իրանի նախագահը նախազգուշացրել է, որ քանի դեռ Իսրայելը, «որին Արևմուտքն աջակցում է քաղաքական, ֆինանսական և ռազմական առումով, Գազայում և այլուր շարունակում է իր ցեղասպանությունն ու ահաբեկչությունը, տարածաշրջանում և աշխարհում կայունություն, անվտանգություն կամ խաղաղություն չի լինի»:
