Նյու Յորքի դաշնային դատախազները Նյու Յորքի քաղաքապետ Էրիկ Ադամսին են հանձնել երդվյալ ատենակալների դատարան ներկայանելու հերթական ծանուցագրերը՝ կապված կոռուպցիոն հետաքննության հետ, որը շարունակվում է գրեթե մեկ տարի, հայտնում է ABC News-ը՝ վկայակոչելով հետաքննությանը ծանոթ աղբյուրներին:

Ադամսը WABC-ի հաղորդավար Բիլ Ռիտերի հետ հարցազրույցի ժամանակ հաստատել է ծանուցագրերի ստացումը:

Ինչպես ավելի վաղ հայտնել էր ABC News-ը, հետաքննությունը առնվազն մասամբ վերաբերում է նրան, թե արդյոք Ադամսը և նրա արշավը անօրինական նվիրատվություններ են պահանջել Թուրքիայից՝ ճնշում գործադրելով հրշեջ ծառայության վրա, որպեսզի այն շտապի ստուգել թուրքական նոր հյուպատոսությունը: Քննիչները նաև քննել են, թե արդյոք Ադամսը Turkish Airlines-ի թռիչքներում սպասարկման դասի բարձրացում է ստացել:

Ադամսի փաստաբանները՝ Բրենդան Մակգուայրը և Բոյդ Ջոնսոնը, հայտարարել են, որ իրենց հետաքննությունն են անցկացրել այն ոլորտների վերաբերյալ, որոնք քննում են դաշնային դատախազները և եզրակացրել, որ քաղաքապետը ոչ մի սխալ բան չի արել:

Հիշեցնենք, որ Politico-ն ավելի վաղ գրել էր, որ Ադրբեջանի կառավարությունը խուզարկությունից ընդամենը մի քանի ամիս առաջ վճարել էր քաղաքապետի երկու օգնականների ուղևորությունների  համար, ինչը հայտարարվել էր որպես տնտեսական զարգացման ուղևորություն։