նախընտրելի դարձնել
Ներգաղթյալներ տեղափոխող նավը խորտակվել է Եմենի ափերի մոտ, ինչի հետևանքով զոհվել է առնվազն 13 մարդ, կան անհետ կորածներ, կիրակի օրը հայտնել է ՄԱԿ-ի միգրացիոն գործակալությունը, հայտնում է Associated Press-ը։
Նավը, որում եղել են 25 եթովպացի ներգաղթյալ, նավապետն ու նրա օգնականը, երկուսն էլ եմենցի, երեքշաբթի օրը շրջվել է Թաիզ նահանգի ափերի մոտ, ասվում է Միգրացիայի միջազգային կազմակերպության հայտարարության մեջ:
Ադենի ծոցը Կարմիր ծովին կապող Բաբ էլ-Մանդեբ նեղուցի ափին հայտնաբերվել է 11 տղամարդու և երկու կնոջ դի, ևս 14 մարդ, այդ թվում՝ երկու եմենցիները, անհետ կորած են համարվում։
Չնայած շուրջ տասնամյա քաղաքացիական պատերազմին, Եմենը, որը սահմանակից է Սաուդյան Արաբիային հյուսիսից և Օմանին հյուսիսարևելքից, շարունակում է մնալ հիմնական ճանապարհը Արևելյան Աֆրիկայից ներգաղթյալների համար, որոնք փորձում են աշխատանք գտնել Պարսից ծոցի հարուստ երկրներում:
