Անօդաչու սարքերի հարձակումների սպառնալիքի պատճառով ժամանակավորապես փակվել են Մուրմանսկի և Ապատիտի օդանավակայանները, հայտնում է SHOT-ը։

Հեռուստաալիքի տվյալներով՝ Մուրմանսկի շրջանը հարձակման է ենթարկվել երեք ուկրաինական անօդաչու թռչող սարքերի կողմից, որոնք շրջան են մտել Արխանգելսկի շրջանից։ Անօդաչուների թիրախը կարող էր լինել «Օլենյա» ռազմական օդանավակայանը։ ՀՕՊ ուժերին հաջողվել է ոչնչացնել երկու անօդաչու թռչող սարք։

Մինչ այս Օդային տրանսպորտի դաշնային գործակալությունը հայտնել էր, որ թռիչքների անվտանգությունն ապահովելու նպատակով ժամը 9:35-ից սահմանափակումներ են մտցվել Մուրմանսկի և Ապատիտի օդանավակայանների շահագործման վրա։ «Ինքնաթիռների անձնակազմերը, ավիադիսպետչերները և օդանավակայանի ծառայությունները ձեռնարկում են բոլոր անհրաժեշտ միջոցները թռիչքների անվտանգությունն ապահովելու համար, դա հիմնական առաջնահերթությունն է», - ասվում է գերատեսչության հայտարարության մեջ:

Մեկ օր առաջ նահանգապետ Անդրեյ Չիբիսը հայտարարել էր Մուրմանսկի շրջանի վրա անօդաչու թռչող սարքի հարձակման մասին։ «Խնդրում եմ ձեզ ըմբռնումով մոտենալ այն ժամանակավոր սահմանափակումներին, որոնք մենք պետք է մտցնենք։ Անվտանգությունը բարելավելու համար ձեռնարկվում են բոլոր անհրաժեշտ միջոցները, և հակաօդային պաշտպանությունն աշխատում է թշնամու անօդաչու թռչող սարքերի ոչնչացման ուղղությամբ»,- ասել է Չիբիսը տեսաուղերձում, որը նա հրապարակել է իր Telegram ալիքում։

Նրա խոսքով՝ սեպտեմբերի 11-ին հակաօդային պաշտպանությունը տարածաշրջանի երկնքում երեք անօդաչու թռչող սարք է խոցել։ Անօդաչու թռչող սարքի գրոհի պատճառով օդային տրանսպորտի դաշնային գործակալությունը ստիպված է եղել փակել Մուրմանսկի և Ապատիտի օդանավակայանները։

Մուրմանսկի շրջանն առաջին անգամ հարձակման է ենթարկվել ուկրաինական անօդաչու թռչող սարքերի կողմից օգոստոսի 21-ին։ Այնուհետև անօդաչուներին հաջողվել է թռչել շրջանի հյուսիսում գտնվող Վիսոկի գյուղ, որի մոտ գտնվում է Օլենյա ռազմական օդանավակայանը, որտեղ տեղակայված են ռազմավարական Տու-95ՄՍ և Տու-22Մ3 հրթիռակիրները։ Ռեյդը, որի ընթացքում Ուկրաինայի զինված ուժերի անօդաչու թռչող սարքերն առաջին անգամ հարձակվեցին Արկտիկական շրջանից այն կողմ թիրախների վրա, պատերազմի սկզբից ի վեր ռեկորդային տարածություն դարձավ. սահմանից մինչև Վիսոկոե հեռավորությունը 1850 կմ է: