ԱՄՆ Վիսկոնսին նահանգից մի կին ձերբակալվել է երեքշաբթի՝ ուրիշի տուն ներխուժելուց հետո։ Կասկածյալ Ջոաննա Քելլի Լիին մեղադրանք է առաջադրվել բնակարանային գողության և հանցավոր օրինախախտման համար, ըստ Մեդիսոնի ոստիկանության բաժանմունքի: Նրան բերման են ենթարկել երեքշաբթի տեղական ժամանակով ժամը 22:40-ի սահմաններում: Ոստիկանությունից հայտնում են, որ դեպքի մասին ահազանգ են ստացել այն բանից հետո, երբ տան բնակիչներից մեկը տուն է վերադարձել երեկոյան 22:30-ի սահմաններում և տեսել ինչ-որ մեկին:

Մեդիսոնի ոստիկանական բաժանմունքից Fox News Digital-ին հայտնել են, որ զոհը «ցնցված է եղել՝ տեսնելով ամենուր միացված լույսերը, քանի որ նա օրվա մեծ մասը բացակայել է»:

«Երբ ոստիկանները ժամանեցին, նրանք պատուհանից տեսան մի կնոջ, որը հանգիստ քայլում էր տան միջով», - ասվում է վարչության հաղորդագրության մեջ: «Մի կին, որը հետագայում ճանաչվեց որպես Ջոաննա Կ. Լին, մոտեցավ դռանը՝ ի պատասխան ոստիկանության հրամանի»:

Իշխանություններն ասում են, որ Լին «հանգիստ ասել է» ոստիկանությանը, որ իրեն թույլ են տվել տուն մտնել և նույնիսկ ասել է բնակչի անունը:

«Լին մանրամասն նկարագրել է, թե ինչպես է նա ավելի վաղ հանդիպել սրճարանում գտնվող բնակչին և ստացել տան բանալիները», - ասել է ոստիկանությունը: «Լին այնքան երկար է մնացել տանը, որ հասցրել է ծովախեցգետիններով և մակարոնեղենով ընթրիք պատրաստել»։

Բնակիչը, սակայն, պնդել է, որ ինքը երբեք չի հանդիպել կնոջը, և որ «Լին թույլտվություն չի ունեցել իր տանը լինելու կամ ուտելու նրա կերակուրը»։

Ավելի ուշ, իշխանությունները պարզեցին, որ կասկածյալը բնակչի փոստն է օգտագործել՝ նրա անունը ստանալու և իր պատմությունը սարքելու համար: Նա անմիջապես ձերբակալվել է և այժմ գտնվում է Դեյն շրջանի բանտում: Իշխանությունները հետաքննություն են անցկացնում։