նախընտրելի դարձնելՄիջազգային վարկանշային Standard&Poor`s գործակալությունը նախազգուշացրել է եվրագոտու 17 երկրներից 15-ում, այդ թվում` Ֆրանսիայում եւ Գերմանիայում, վարկային վարկանիշների հնարավոր նվազեցման մասին:
Գործակալության մամլո հաղորդագրության մեջ նշվում է, որ եվրոպական միասնական արժույթի երկրների վարկային վարկանիշների վերանայումը տեղի կունենա դեկտեմբերի 8-9-ը կայանալիք ԵՄ գագաթաժողովի ավարտից անմիջապես հետո: Ինչպես սպասվում է, Ավստրիայի, Բելգիայի, Լյուքսեմբուրգի, Նիդեռլանդների, Ֆինլանդիայի եւ Գերմանիայի վարկանիշները, որոնք այժմ վարկային ամենաբարձր կարգավիճակում են`AAA, կարող են նվազել մեկ աստիճանով:
Իռլանդիան, Իսպանիան, Իտալիան, Մալթան, Պորտուգալիան, Սլովակիան, Էստոնիան եւ Ֆրանսիան կարող են միանգամից երկու աստիճան կորցնել: Չի փոխվի միայն Հունաստանի վարկային կարգավիճակը, որը S&P-ն դեռ հունիսին իջեցրել է մինչեւ «աղբ» CCC-ի, ինչպես նաեւ Կիպրոսի վարկանիշը, տեղեկացնում է «Утро.Ру»-ն:
Գործակալության որոշումը պայմանավորված է նրանով, որ Եվրամիության տնտեսությունը վերջին շաբաթներին բախվել է լուրջ խնդիրների հետ` վարկավորման պայմանների վատթարացում, պետական պարտատոմսերի աճ, ճգնաժամից դուրս գալու միջոցների շուրջ քաղաքական տարաձայնություններ, եվրագոտու երկրների հսկայական պարտք եւ ճնշումների մեծ վտանգ:
