Թբիլիսիում տրանսգենդեր կին է ծեծի ենթարկվել՝ Նատա Թալիկիշվիլին, ով եկել էր «Վրաստանն ընտրում է Եվրամիությունը» եվրոպամետ հանրահավաքին։ Սա երկրորդ հարձակումն է «ԼԳԲՏ քարոզչության մասին» օրենքի ընդունումից հետո, հայտնում է SOVA-ն։

Կիրակի երեկոյան անհայտ տղամարդը հարձակվել է Թալիկիշվիլիի վրա՝ նախ վիրավորել է նրան, ապա աղյուսով հարվածել նրա գլխին։ Տուժածի մոտ ուղեղի ցնցում է ախտորոշվել։

Ավելի վաղ, կառավարամետ POSTV հեռուստաալիքը հայտնել էր, որ Թալիկիշվիլին հոկտեմբերի 20-ին մասնակցել է Ազատության հրապարակում տեղի ունեցած հանրահավաքին։

Հիշեցնենք, որ սեպտեմբերի կեսերին սպանվել էր Վրաստանում ամենահայտնի տրանսգենդեր կինը՝ Կեսարիա Աբրամիձեն։ Նրա ընկերոջը մեղադրում էին սպանության մեջ։ Նա խանդի պատճառով դանակի հարված է հասցրել նրան մինչև 60 անգամ, ինչպես նշել են Կեսարիայի մերձավորները, մեղադրյալն ինքը լռում է և գտնվում է բանտում։ Գործի դատաքննությունը շարունակվում է։