ՆախընտրելիՄերձավոր Արևելքում իրավիճակը կարող է ավելի բարդանալ, քանի որ ակնկալվում է ԱՄՆ-ի անվերապահ օգնությունն Իսրայելին։ Այս մասին NEWS.am-ի «Ուժի գործոն» հաղորդման ժամանակ նշեց միջազգայնագետ Սուրեն Սարգսյանը՝ խոսելով Թրամփի նախագահության օրոք իրադարձությունների հնարավոր զարգացման մասին։
Նրա խոսքով՝ Բայդենի թիմն ավելի զգույշ է գործել։ Չնայած Բլինքենը մի քանի անգամ այցելել է տարածաշրջան, ինչը պետք է դիտարկել որպես ուղղակի օգնություն։
«Թրամփն ասում է, որ Իսրայելը ռազմավարական դաշնակից է, մի քանի շաբաթ առաջ նա հանդիպել է Նեթանյահուի հետ: Կարեւոր է հասկանալ, թե որքան հեռու է նա գնալու։ Թրամփը մի կողմից խոսում է Իսրայելն ամեն գնով պաշտպանելու մասին, մյուս կողմից խոսում է խաղաղության մասին»,- նկատեց Սարգսյանը։
Միաժամանակ նա չբացառեց, որ Իրանի հետ հարաբերությունները կխստանան, իսկ Ռուսաստանի հետ հարաբերությունները, ընդհակառակը, կբարելավվեն։ Այս համատեքստում քաղաքագետը համաձայնեց այն կարծիքին, որ Իրանի մասնակցությամբ մեծ պատերազմի հավանականություն կա։
Սարգսյանը հիշեցրեց, որ սա Թրամփի վերջին նախագահական ժամկետն է, ուստի նա կորցնելու ոչինչ չունի։ «Այսինքն՝ նա կձգտի՞ խաղաղություն հաստատել, թե՞ կփորձի պարտադրել»,- նշեց Սարգսյանը։
