նախընտրելի դարձնելՍտոկհոլմում եւ Օսլոյում այսօր` դեկտեմբերի 10-ին, կկայանա Նոբելյան մրցանակների հանձնումը եւ դափնեկիրների ու հյուրերի տոնական խնջույքը: Միջոցառումը, ավանդույթի համաձայն, կկայանա Ալֆրեդ Նոբելի հիշատակի օրը, որը կյանքից հեռացել է 1896թ. դեկտեմբերի 10-ին:
Երեսուն դափնեկիրներից 9-ին Ստոկհոլմի ֆիլհարմոնիայում պատվավոր դիպլոմ եւ մրցանակի հիմնադրի դիմանկարով ոսկե մեդալ կհանձնի Շվեդիայի թագավոր Կարլ ХVI Գուստավը: Ֆիզիոլոգիայի եւ բժշկության ոլորտի մահացած դափնեկիր Ռալֆ Սթայնմանին կներկայացնի կինը` Քլոդիան:
Շվեդ հայտնի բանաստեղծ Թոմաս Թրանսթրեմերը կաթվածից հետո արդեն մի քանի տարի գրեթե չի խոսում եւ գամված է հաշմանդամի սայլակին: Մրցանակների հանձնման արարողությանը բանաստեղծը մնացած մասնակիցների հետ նստած կլինի, այնուհետեւ նրան կտանեն բեմի կենտրոն` մրցանակն ստանալու համար:
Խաղաղության մրցանակը, Նոբելի կտակի համաձայն, կհանձնվի Օսլոյում: Այն կկիսեն երեք կանայք` Լիբերիայի նախագահ Էլեն Ջոնսոն-Սերլիֆը, լիբերիացի իրավապաշտպան Լեյմահ Գբովին եւ եմենցի ակտիվիստ Թավաքուլ Քարմանը:
Նորվեգական Նոբելյան հանձնաժողովի ընտրությունը ողջունել են ֆեմինիստական շարժման ներկայացուցիչներն ամբողջ աշխարհում:
Նոբելյան մրցանակների հանձնման այսօրվա արարողությունը 110-րդն է: Վեց դասակարգերից ուրաքանչյուրում դրա չափը կազմում է 10 մլն կրոն (1,49մլն դոլար):
Մայրաքաղաքի ոստիկանությունը եւս պատրաստվում է այս օրվան: Ստոկհոլմում միանգամից երկու ցույց է նախատեսված` աջծայրահեղականների ջահերով երթ Հին քաղաքում`«Դադարեցնել թշնամությունը շվեդների հանդեպ» լոզունգով, ինչպես նաեւ` մի քանի հակառասիստականների:
Իրավապահները կփորձեն թույլ չտալ այս երկու խմբերի բախումը, որպեսզի ապահովեն նոբելյան ավանդական տոնակատարությունների հանգիստ անցկացումը, գրում է ԻՏԱՌ-ՏԱՍՍ-ը:
