նախընտրելի դարձնելԻնտերնետային www.armatner.am հասցեով սկսել է գործել «Հովհաննես Իմաստասեր Կաթողիկոս Օձնեցի» բարեգործական հիմնադրամի կայքը: Համացանցն համալրվել է եռալեզու տեղեկատվության աղբյուրով հիմնադրամի ծրագրերի մասին, որոնցից առանցքայինն է հայկական հնադարյան գլուխգործոցներից մեկի` Օձունի Սուրբ Մարիամ Աստվածածնի եկեղեցու վերածնունդը: Մշակույթի նախարար Հասմիկ Պողոսյանը Օձունի եկեղեցու վերականգնման ծրագիրն աննախադեպ է անվանել, քանի որ դրա իրագործման գումարը հատկացվելու է մասնավոր հիմնադրամի կողմից:
Կայքի «Մամուլի կենտրոն» բաժնում առանձնահատուկ հետաքրքրության են արժանի վավերագրական ֆիլմերը Օձուն գյուղի եւ այնտեղ գտնվող սրբատեղիի վերաբերյալ, վերջինիս խորանի ներքո, ըստ ավանդության, թաղված է Հիսուս Քրիստոսի բարուրաշորը:
Առաջիկայում www.armatner.am կայքի հիմնական բովանդակությունը կդառնա Օձունի եկեղեցու վերականգնումն իրականացնող շինարարական կազմակերպությունն ընտրելու մրցույթի մասին տեղեկատվությունը, ինչից հետո փուլ առ փուլ տեղեկություններ կտրամադրվեն բուն աշխատանքների վերաբերյալ, որոնք կտեւեն մոտ 3 տարի: «Հովհաննես Իմաստասեր Կաթողիկոս Օձնեցի» բարեգործական հիմնադրամի հոգաբարձուների խորհրդի անդամները` ի դեմս Հայաստանի մտավորականության վառ դեմքերի, կպատմեն կայքի այցելուներին հայ ժողովրդի կյանքում Օձունի եկեղեցու ունեցած դերի մասին:
Նախատեսվում է, որ հիմնադրամի աշխատանքի հաջորդ փուլը կլինի հանրապետության տարածքում պատմական հուշարձաններից այնպիսի մեկի վերականգնումը, որը կապված է Հայաստանի եւ Ռուսաստանի համատեղ պատմության հետ:
