Ավստրալիայի դատարանը չեղյալ է համարել Մելբուռնում զույգի ամուսնությունն այն բանից հետո, երբ հարսնացուն դատարանին հայտնել է, որ մասնակցել է հարսանեկան արարողությանը, կարծելով, որ դա սոցիալական ցանցերի համար նախատեսված «կեղծ ներկայացում» է, հայտնում է CNN-ը։

Ավստրալիայի Դաշնային շրջանային դատարանի և ընտանեկան գործերով դատարանի կողմից հրապարակված փաստաթղթերի համաձայն, 20-ամյա կինը ծանոթացել է 30-ամյա տղամարդու հետ ծանոթությունների հարթակում 2023 թվականի սեպտեմբերին: Հաջորդ օրը նրանք անձամբ տեսակցել են և սկսել են հանդիպել։

Կինը ընտանեկան գործերով դատարանում պատմել է, որ իրենք այդ տարվա հոկտեմբերին սկսել են նախապատրաստվել Սիդնեյ ուղևորությանը, քանի որ տղամարդն ասել էր, որ ցանկանում է դեկտեմբերին նրան այնտեղ տանել:

Կնոջ վկայությամբ, տղամարդն իրեն ամուսնության առաջարկություն է արել դեկտեմբերի վերջին, և ինքը ընդունել է։ Երկու օր անց նրանք ամուսնացել են Սիդնեյում տեղի ունեցած արարողության ժամանակ, սակայն կինը կարծել է, որ հարսանիքը «ամբողջովին կեղծ է եղել»:

Կինը պատմել է, որ փեսացուն ասել է, որ միջոցառմանը գա սպիտակ զգեստով, քանի որ այնտեղ «սպիտակ երեկույթ» է լինելու, երեկույթ, որտեղ բոլոր հյուրերը սպիտակ հագուստներով են, և քանի որ ճամփորդությունը նախապես էր ծրագրված, նրանք Քուինսլենդում նախկինում մասնակցել էին սպիտակ երեկույթի։

Երբ եկել է պայմանավորված վայրը, ոչ մեկին չի տեսել սպիտակ հագուստով։ Երբ հարցրել է տղամարդուն, թե ինչ է կատարվում, նա մի կողմ է տարել նրան և ասել, որ հարսանիքի «կեղծ ներկայացում» է կազմակերպում իր սոցիալական ցանցի, մասնավորապես Instagram-ի համար, քանի որ ցանկանում է ավելացնել կոնտենտի քանակությունը և սկսել դրամայնացնել Instagram-ի իր էջը:

Նա պատմել է, որ փեսան սոցցանցերի ինֆլյուենսեր  էր, այս պնդումը տղամարդը հերքել է, բայց խոստովանել է, որ Instagram-ում ավելի քան 17000 հետևորդ ունի:

Դատական ​​փաստաթղթերի համաձայն, հարսնացուի ընտանիքից կամ ընկերներից որ մեկը արարողությանը ներկա չի եղել․ մասնակցել են միայն լուսանկարիչն ու լուսանկարչի ընկերը։ Կինը դատարանին պատմել է, որ «կատաղել» է, երբ 2024 թվականի փետրվարին պարզել է, որ ամուսնությունն իրական է եղել, և որ տղամարդը ապաստան էր փնտրում: