ՆախընտրելիՌուսաստանի Տոմսկ քաղաքի կենտրոնական հրապարակի մոտակայքում գտնվող Աստվածահայտնության տաճարի զբոսայգում հայկական խաչքար է տեղադրվել:
«Այս հուշարձանը մենք նվիրում ենք Հայաստանի եւ Ռուսաստանի բազմադարյա բարեկամությանը: Խաչքարի տեղադրման հարցը նախօրեին արժանացել է Տոմսկի քաղաքային դումայի հավանությանը», -հայտարարել է Տոմսկի մարզի հայերի միության նախագահ Ռուբեն Մանուկյանը, որի խոսքերը մեջբերում է «Ինտերֆաքս» գործակալությունը: Նրա խոսքով` հուշարձանն իրենից ներկայացնում է երկու քարե խաչ` մեկը մյուսի մեջ, բարձրությունը երեք մետր է:
Տոմսկի մարզի հայերի միության նախագահը նշել է, որ Ռուս ուղղափառ եկեղեցու Տոմսկի թեմը եւս հավանություն է տվել խաչքարի տեղադրմանը: «Մենք անցել ենք բոլոր ընթացակարգերը, խաչքարի տեղադրման բոլոր կանոնները պահպանված են, տեղի են ունեցել հասարակական քննարկումներ»,-ընդգծել է Մանուկյանը:
Նա ավելացրել է, որ պաշտոնական տվյալներով Տոմսկի տարածաշրջանում բնակվում է մոտ 2 հազ. հայ, ոչ պաշտոնական տվյալներով` մոտ 5 հազար:
