Մեծ խնդիր կա անցյալ տարվա պարգեւատրված զենքերի հետ կապված։ Այս մասին հունվարի 16-ի մամուլի ասուլիսում հայտնել է ՀՀ ներքին գործերի նախարար Արփինե Սարգսյանը։

Նրա խոսքով՝ հայտնի են շատ դեպքեր, երբ մարդիկ զենք ունեն, որով պարգեւատրվել են անհասկանալի հանգամանքներում։

«Պետությունը պետք է հասկանա զենքով պարգեւատրման չափանիշը։ Քաղաքացիներն ահազանգեր են ստանում, որ ինչ-որ մեկը պրեմիում դասի զենք ունի, նա էլ թմրամոլ է։ Պետությունը պետք է զտի պոտենցիալ վտանգավոր անձանց եւ թողնի զենքերը նրանց մոտ, ովքեր համապատասխանում են չափանիշներին: Մյուսները չպետք է իրենց մոտ զենք պահեն։ Օրինագիծը շուտով կհրապարակվի, եւ մենք հույս ունենք նվազեցնել զենքի կիրառմամբ հանցագործությունները»,- նշել է նախարարը։

Նա հայտնել է, որ 2024թ. առգրավվել եւ կամավոր հանձնվել է մոտ 1 600 ատրճանակ, ինչը 10,7 տոկոսով ավելի է, քան նախորդ տարի։