Այս շաբաթ Թաիլանդի վարչապետ Պաետոնգտարն Շինավաթրան հայտնել է, որ իրեն զանգահարել է մեկը, որը ներկայացել է որպես համաշխարհային մեկ այլ առաջնորդ, որի անունը նա չի նշել, տեղեկացրել է NBC News-ը:

«Ես հստակ լսում էի, որ դա երկրի ղեկավարի ձայնն է»,- ասել է նա չորեքշաբթի՝ ավելացնելով, որ զանգահարողը կարող էր արհեստական ​​բանականություն օգտագործել՝ այլ առաջնորդի ձայնը նմանակելու համար:

Ամեն ինչ սկսվել է ձայնային հաղորդագրությունից, որում մի մարդ հարցրել է, թե ինչպես է Պաետոնգտարնը, եւ ասել է, որ անհամբեր սպասում է նրա հետ համատեղ աշխատանքին: Նա պատասխանել է, որ լավ է, զրուցակիցն ասել է, որ նորից կզանգահարի։

Ավելի ուշ այդ մարդը փորձել է զանգահարել, «բայց բարեբախտաբար երեկոյան ժամը 11-ն էր, եւ ես չպատասխանեցի զանգին»,- ասել է 38-ամյա Պաետոնգտարնը, որն օգոստոսին դարձել է երկրի ամենաերիտասարդ վարչապետը եւ նախկին վարչապետ Թաքսին Շինավաթրայի դուստրն է։

Առավոտյան նա տեսել է բաց թողնված զանգը եւ պատասխան հաղորդագրություն գրել՝ հանդիպում կազմակերպելու համար: Այնուհետեւ նա ստացել է մեկ այլ ձայնային հաղորդագրություն՝ խնդրելով նվիրատվություն, ասելով, որ Թաիլանդը Հարավարեւելյան Ասիայի ազգերի ասոցիացիայի (ASEAN) միակ անդամն է, որը նվիրատվություն չի կատարել:

Երբ նա ստացել է մեկ այլ հաղորդագրություն օտարերկրյա բանկային հաշվին գումար փոխանցելու հրահանգով, հասկացել է, որ «դա ճիշտ չէ»,- հայտնել է Պաետոնգտարնը: